أكيد فى مصر

كالعادة وبكل سعادة سألت ناس عن الحل، وقالو نظريات جامدة جداً..
* الفلوس :-
ما هو انا لو معايا فلوس كتير ماكنش هيبقى فى مشاكل، اشترى فيلا كبيرة واقعد فيها انا وعيلتى، وافتح شركة اروح اقعد فيها تلات اربع ساعات بالكتير فى اليوم، وأروح اقعد مع عيلتى ، وأولادى وأستمتع بحياتى، وهتيجى منين المشاكل وانا معايا فلوس. لو سايق عربيتى وحد فكر يسحب الرخصة هجيبها بفلوسى، لو روحت اى مكان هبقى محترم فيه غصب عن عين التخين بفلوسى. هبقى مطمئن من بكرة ومش خايف من اللى ممكن يحصل فيه علشان هكون مسنود من فلوسى.
* السُلطة :-
يا عم انا لو ظابط شرطة او عضو مجلس شعب، آيه هيخلينى اقلق من اى حاجه ولا يبقى عندى مشاكل من اى نوع. اعمل اللى انا عايزة فى الوقت اللى انا عايزة من غير ما اعمل حساب لحد او لأى حاجه ممكن تعكر عليا الحياة.
* صَنعة ( حرفة يدوية ) :-
لما يبقى فى إيدى صنعة فى البلد دى كانت ظبطت الحياة معايا كويس جدا، وحياتى اتروقت على الآخر. واللى اشاور عليها اتجوزها. دكتورة، مهندسة ، مدرسة. انا راجل صنايعيى قد الدنيا واللى معاها قرش بيسوى قرش.
* لاعب كرة قدم :-
كلمة السر للنجاح فى العصر ده هو انك تبقى لاعب كورة، يا سلام كده وانت لاعيب فى الاهلى ولا الزمالك، ولا احسن باشا فى البلد، فلوس وشهرة وسلطة ونغنغه. ماحدش يقولك رايح فين ولا جاى منين ولا بتعمل آيه. حاجه فل.
* الهجرة :-
خلاص مافيش فايدة فى البلد دى، الهجرة هى الحاجه الوحيدة اللى ممكن تنقذنى من اللى انا شايفه فى البلد دى، يا استاذ اللى هعمله هنا فى سنة هعمله هناك فى يوم، وعايش بإحترام مع ناس محترمين، لا بتهان ولا حد بيبصلى فى لقمة عيشى. وكل واحد بياخد حقه هناك.
* المشاريع الناجحة :-
شوف اللى ماشى فى البلد اليومين دول كام مشروع ما بيخسروش ( سنترال ، سوبر ماركت ، تاكسى او ميكروباص ، إنترنت كافية ، محل آكل او فرن ) اى حاجه من دول ما يتخسرش أبدا . هفتح مشروع من دول والحياة تبقى ظباطه.
------------------------------------------------
لما تلاقى الناس كده من حواليك
وتسمع كلامهم والحسرة تملى قلبك وعنيك
وتبص للهرم والكرنك وكل قصر
ابتسم وقول يبقى انا اكيد اكيد فى مصر

الثقافة

مرة كنت قاعد مع مدونين دماغ وإتسال سؤال لولبى، يعنى آيه إنسان مثقف ؟
وكان فى إجابة من ضمن الإجابات إن المثقف اللى بيعرف حاجات قليلة عن حاجات كتيره.
لو فرضنا ان ده مفهوم الإنسان المثقف، تعالو نشوف حال الشعب المثقف بتاعنا مفهومه آيه عن الثقافة اللى أهم مصادرها عندهم الإعلام، سواء مرئى او مسموع او مقروء.
طبعا المسموع بقى موضه قديمة وما بيقدرش ينقل الصورة كاملة ونسبة تغطيته مش عالية، والمقروء لا سمح الله مش من شيمة العرب الجدد واى محاولة مقارنة بمستوى قرأة المجتمع العربى كله ببلد واحد غربيه او حتى مع اسرائيل هنلاقى كارثة، فيفضل مصدر الثقافة الماتح لمعظم الشعب هو الاعلام المرئى.
بقى طبيعى جدا آلاقى مطرب يطلع قول انا قدوة للشباب ولازم اجدد فى لبسى وإستايلى وطريقة ظهورى علشان الشباب يلاقى مثل يمشى عليه.
ياخى – كلمة قبيحة – عليك وعلى القدوة اللى بتقدمها للشباب.
وتلاقى مطرب تانى طلع لابس شراب فى دماغه تانى يوم الصبح تلاقى البلد كلها شربات وهى مبتسمه وفرحانه انها بتتطور وماشية مع العصر مش متأخرة ولا متخلفة لا سمح الله.
تطلع راقصة قد الدنيا تطلع تقول ان الرقص مش حرام، وانه عمل شريف. وبما ان العمل عبادة فهي كده كإنها بتصلى لما ترقص رقص محترم، لا يثير الغرائز لا سمح الله.
طيب دى يتقالها آيه؟ حتى الكلام القبيح خلى من معنى ممكن وصف الإنسانة – إن جاز وصفها كذلك – دى بيه.
يطلع لاعب كورة جامد يضرب ظابط شرطه او أمين أو حتى عسكرى نفر، طيب على آيه الإحساس انك خارق للعادة ؟ عامل فيها السبع رجالة فى بعض ليه ؟ وتلاقى الناس تهتم جدا بالموضوع ويفضل فى حلقات نقاشهم لمدة طويلة وبإهتمام بالغ، علشان يوصلو سر تفوق اللاعب على المواطن الغلبان فى المطالبة بحق الرد على إساءات الشرطة للمواطنين فى حالة حدوثها.
سيبكم من الناس الوحشة دى كلها، تعالو على البرامج الحوارية اللى بتطلع فى التليفزيون عمال على بطال، يجيبو واحد صاحب رأئى ما ، ويقعدوه مع واحد صاحب رأئى مضاد تماما شكلاً وموضعاً. الطبيعى آيه اللى يحصل لما تحط ديكين من نوع مختلف فى مكان واحد ؟ لازم يتناطحو وتبقى خناقة، الناس تتبسط ان فى حد بيزعق وحد بيرد عليه وشوية وهيمسكو فى بعض. واللى يحصل إقبال جماهيرى والنتيجة إعلانات.
حلو قوى الوصول للإعلانات.. فكرت كتير مين اصلا بيتصل بإعلانات 0900 والحوار ده، مين من السذاجة انه يشارك فى تفاهه من النوع ده؟ وتلاقى الاعلان بيحمل مضمون ثابت. يجيب واحد يائس من حياته ومش عارف يعمل آيه، ويركز قوى انه مش طايق نفسه، وفى الناحية التانية يجيب واحد قاعد فى البيسين حواليه بنات بالبكينى وفى الخلفية بيت فخم، وان الحل علشان توصل من الشخص ده للشخص ده هوا الاتصال على الرقم التالى وانت تكسب وتتظبط فى الحياة.
ولا الاعلان ان علشان يبقى عندك عربية مرسيدس يا إما تتعب ويطلع عين اللى خلفوك وفى الآخر تحصل على العربية او انك بكل بساطة تشترى المنتج ده وهو يجيبلك العربية لحد عندك.
يا سلام بالبساطة دى الحياة مش مستاهلة تعب ولا مجهود، وانت تتعب ليه اصلا وتفكر ليه من الاساس، انت الغى دماغك واتصل وانت مغمض على الرقم وكل مشاكلك تتحل بكل بساطة وسهولة.
فعلا ونعم الثقافة.

بين المطرقة والسندان

كثيرا ما يواجه الإنسان اوقات تحاط أحلامه بين المطرقة والسندان، بين ظروفة التى لم يختار منها شئ، وبين إمكانياته التى استطاع ينميها بقدرة الله عز وجل اولا واخيرا وبإمكانياته التى صنعها لنفسه.
كثيرا ممن شاءت أقدارهم ان يصلو لهذه النقطة خسروا الكثير من احلامهم بسبب ظروفهم، ومنهم من استطاع ان يأقلم إمكانيته لمواكبة الظروف التى يمر بها. لكن السؤال الأهم لماذا ؟
فى كثير من الدول العربية يواجه الشباب تلك المرحلة بشتى طرقاتها ومحتواياتها.
فى مصر وكثير من الدول العربية يواجه الشباب التجنيد الإجبارى بعد إنتهاء الدراسة وكأن فترة التجنيد هى عقاب على إنتهاء الدراسة.
فى العراق وفلسطين يواجه الشباب ظروف سياسية لم يختار منها شئ، فمن الممكن ان يستيقظ الشاب متوجهة الى عمله ليجده اصبح مدمر بالكامل او يتم إعتقاله بتهمة لا يعرف عنها شئ.
فى لبنان أحزاب سياسية تتصارع من اجل إثبات القوة المطلقة والخاسر الوحيد هو الشباب.
فى دول الخليج تتحكم العادات والتقاليد مقاليد الحكم والإدارة، فالعمل ليس مكفول للأكفاء فقط بل تدخل طرقات اخرى ليس لشباب بها سبيل فى تطوير نفسه من خلالها.
دول المغرب العربى وتونس والجزائر مشكلة الهوية بين العرب والغرب، مشكلة تصارع الثقافات وقتال الحضارات الدائر من تحت السطح يدمر الكثير من احلام الشباب.
الكثير والكثير من المطرقات والسندان فى الوطن العربى، ودائما يلقى الكاهل على الشباب وان الحكومات ليست المتسبب الوحيد فى كل هذه المشاكل وان على الشباب المشاركة فى حلها.
ويأتى الشباب بالأفكار وبالجمعيات الأهلية الغير حكومية لتجد مطرقة الحكومات وسندان الإمكانيات لكى يتم إبطال مفعولها الحقيقى وهى القدرة على توجيه الشباب الى طرق افضل.
مملة هى الحياة التى لا تنتهى ابدا من كونها بين المطرقة والسندان.

الحضارة المفقودة

منذ بدأت البشر على الأرض فكروا فى فعل أشياء كثيرة وأهمها بناء حضارة.

من أقدم الحضارات على الأرض الحضارة الفرعونية، التعمق فى البحث فى اسباب قيام الحضارة الفرعونية نجد عامل أساسى فى قيامها وإستمرار تداول المنهج الى اكثر من 10 قرون متتاليه فى اعمال معينة. هذا العامل هو الضمير .

فطن ملوك الفراعنة الى شقى الضمير لدى الإنسان، ضمير لما يفعله الإنسان مع الإنسان، وما يفعله الإنسان مع الآلهة. قامت الحضارة الفرعونية عندما استطاع الفرعون توحد شقى الضمير، واصبح لدى المواطن العادى الإيمان بأن الملك هو من سيأخذ بيده ليعبر به الى الخلود. وبدأ الناس فى تنفيذ أوامر الفرعون ومراعاة ضميرهم فى تنفيذ أوامره وتوريث هذا الضمير الى أبنائة والى أحفاده.

قامت الحضارة الإسلامية أيضا الى أساس الضمير الإنسانى فى علاقته مع الناس وفى علاقته مع الله، وكانت أوامر الرسول صلى الله عليه وسلم فى إتقان العمل وليس مجرد إنجازة دليل على أهمية الضمير فى قيام الحضارة الإسلامية، وفى إنهاريها أيضا.

فعندما يغيب اى شق من شقى الضمير يتحول التقدم فى الحياة الى حلقة مفرغة لا هدف له. مجرد إزدهار نمط الحياة بدون هدف. نجد الغرب الآن فى تقدم عالى فى اساليب الحياة لإنه إستخدم شق الضمير الخاص بمعاملاته مع الناس، فهو يتقن تنفيذ عمله ولو بدون رقيب مباشر عليه، لإيمانه بأهمية إتقان العمل, لكن على المستوى الأخلاقى نجد غياب الضمير مع الله ادى الى ضياع قيمة الإنسان كإنسان، نسبة إنتحار عالية لفقدان هدف أسمى فى الحياة من المال، علاقات
إجتماعية غير مترابطة، نجد الترابط الإجتماعى لا يزيد عن فردين. ومفهوم العائلة مفهوم مؤقت وليس دائم. بالرغم من الحرية الجنسية - المسماه حرية فى نظرهم - أكبر نسبة إغتصاب فى العالم فى الولايات المتحدة، وخصوصا زنا المحارم. إن إختفاء عامل الضمير مع الله اوجد فى الغرب أشباه حياة. فالتعبير السائد عن اى مغترب انه مفتقد الحياه ، وهكذا تعبير من يأتى للسياحة فاول ملاحظة تعير إنتباهه أن هناك حياة.
عالمنا العربى الكبييييييييير، فقد الضمير بشقيه منذ زمن طويل والنتيجة، ضياع أجيال فى النهم على اللاشئ، فلا هو قادرعلى ان يجد نفسه فى العمل او فى ان يتجه اللى الله الإتجاه الأمثل المعتدل.إبتداء من عامل النظافة المفتقد للضمير
ولا يعمل اللا فى وجود رئيسه المباشر وإذا ادار ظهره توقف عن العمل ، الى رئيس دولة باع شعبه. فماذا ننتظر من أمه بلا ضمير ؟

اعتقد الحل ليس فى تغيير قمة الهرم، بل تغيير قاعدة الهرم الأولى. أن نبدأ أنت وأنا فى التتغير، ان يصبح لنا ضمير.