الفدائيين

يوم 24 يناير المخلوع ونظامه كان فاكر كام واحد هينزل بكرة؟
يوم 6 ابريل 2008 كان فى عربية امن مركزى على كل ناصية، وأظهر أنه فعلا خايف من الناس. بس الناس مانزلتش. والنظام حس انه إتهز أونطه. فقرر انه ما يظهرش تانى انه خايف ولا فارق معاه اى دعوة لمظاهرة لإن ماحدش هينزل.
النظام كان عارف ان فى يوم ممكن يجى والبلد تفلت من إيده، وعمل حساب اليوم ده وحرق يوم 28 يناير بنظام ممنهج وبخطة موضوعة سلفاً مستندات ومقرات وأدلة، لإنه شاف ان اليوم ده جه.
طيب دلوقتى فى كام واحد مضمون نزلوهم الميدان لو تمت الدعوة للنزول؟
مش هحسب اى ظلم مباشر قبل 25 - ودول كتير جدا - تعالو نشوف حسابات من 25 يناير للنهاردة:-
* الارقام التقريبية للشهداء والمفقودين مجتمعين فى كافة الاحداث تقريباً 4000 شهيد ومفقود. ولو قولنا ان متوسط أقارب ومعارف الشهيد الواحد متوسط 30 شخص. يبقى بداية كده 120000.
* المصابين بقى حدث ولا حرج بمختلف الإصابات متوسط تقريباً 10000 بالإضافة الى أقاربهم ومعارفهم 310000.
يعنى الناس اللى لها حق أصيل فى الثورة وفى التغيير وفى الإعتصام المفتوح لحد ما حقهم يرجع واللى ضحواعلشانه بأرواحهم وبفقد أجزاء من أجسادهم 430000 مواطن مصرى.
* كل مواطن أصابه ضرر مادى أو معنوى بسبب تعمد الإنفلات الأمنى وتأثيره على الإقتصاد وعلى ضياع أرواح وممتلكات له الحق انه يعتصم ويطالب بمحاسبة المسئولين عن إدارة شئون البلاد طوال الفترة الماضية. لإن الشعب المصرى مش غنم يرعاه راعى يقرر متى وكيف يشاء ياكل ويشرب ويعيش. وإن المتصدر المسئولية لازم يعرف ان عواقب التخاذل او تعمد التراخى عن أداء الواجب له عواقب لازم يتحملها.
الطائفة دى من المتضررين هما كل المواطنين المصرين فى الداخل والخارج.
طيب يبقى مين اللى فاضل علشان اللجان الالكترونية وإإتلافات صوت الغالبية الصامتة والعباسية؟
هؤلاء فى نظرى مقسمين الى أقسام:-
- منتفعين بشكل مباشر منما - كانت - مصر عليه. ودول مش هيختفوا من البلد ولا هيبطلوا بكل الطرق انهم يبقوا النظام - القديم - على ما هو عليه.
- المتضررين من النظام السابق لكن مصدر معرفتهم الأساسى هو الاعلام الحكومى. ودول كل اللى ناقصهم انهم يصحوا الصبح يلاقوا حمدى قنديل أصبح وزير الاعلام لحد ما هو يلغى الوزارة بنفسه.
- كل من هو فى منصب هو ليس الأجدر به. الشبكة دى فيها من أكبر موظف حكومى الى اصغرهم. كل شخص فى المكان الغلط وعارف ان لو البلد مشيت خطوة واحد بس لقدام هو لازم يترمى من منصبه لإنه سبب فى إنها ماشية لورا. دول فى نظرى ضحية اكتر من إنهم جناة فى تجنيهم وكراهيتهم للثورة، بس لو دامت لحسنى مبارك كانت دامتلهم، كدة كدة مصيرهم استمارة 6.
اللى انا بستغربله جدا هو المجلس ليه ماعندوش الحسابات دى؟ أو ليه عنده وعامل نفسه مش شايفها؟ ولو متمسك بسياسة خليهم يتسلوا بتاعة حسنى. بلال فضل كان بيتكلم انه من مش منطقى انك تعادى جيل ثائر. جيل فيه من يفتدى البلد بدمه وروحه علشان البلد تنضف، ومن يفتديها بإستعدادة انه يضيع حياتة كلها فى بناية دولة مش هيجنى ثمار بنائها غير الجيل اللى بعده.
ان شاء الله متأكد من اليوم اللى بناتى هيفتخروا بأبوهم بإنه من فدائيين مصر سواء بروحه ودمه أو ببنائه لوطنه.

الفهامة

أكبر مشكلة بتواجها السلطة فى مصر انها حافظة مش فاهمة. حافظة انها لما تضرب المربوط يخاف السايب، فاهمة ان الشعب صفارة تجمعه وعصاية تفرقه، حافظة ان تلهى الناس فى اى حاجة علشان ماحدش يفكر فى اللى بتعمله السلطة، حافظة انها تجيب شماعات كتير تقدر تشيلها اى حاجه هى بتعملها غلط، حافظة انها أكبر من النقد والإنتقاد والمسائلة والحساب، حافظة ان الشعب طيب وغلبان وبكلمتين حلوين ودمعتين صغنين وقرشين ممسوحين هتاكل دماغهم وتخرس لسانهم وتوقف عقولهم.

مؤخراً ظهر مشكلة الحفظ لدرجات بعيده جدا منها :-

* فى معتصمين فى ميدان التحرير. وماله مش عيب ولا حرام نسيبهم بالليل ونصحى الصبح ياخدوا الطريحة التمام وخلاص على كده.

الموضوع ده حصل كام مرة من 11 فبراير لحد الجمعة اللى فاتت ؟؟؟ كتير ومافيش اى تطورات بتحصل بعد الموقف ده.

* طيب الموضوع تطور وماحدش عارف مين بالتحديد اللى بيقود عمليه الحشد والتجمع. وماله مش عيب ولا حرام الكتاب بيقول آيه؟ الكتاب اللى قرأ منه حسنى مبارك انه جاب الاخوان وكام واحد من أحزاب توم وجيرى وقعد يرغى معاهم. بس إكتشف انهم ما يقدروش انهم يمشوا الناس اللى فى التحرير. فبدأ إنه يجيب بلطجية ويطلقهم على الناس اللى فى التحرير ويقول عليهم أنصار مبارك ضد معارضى مبارك. وعمل كل ما تتخيله ولا تتخيله علشان الناس تمشى وبرضه مافيش فايده.

طيب المجلس العكسرى قرر آيه دلوقتى؟ بالتأكيد علشان حافظ مش فاهم راح مطلع نفس الكتاب وبدأ ينفذ اللى فيه، البدء فى تسريب إشاعات علشان يجس نبض الناس اللى التحرير ممكن يسكتوا بآيه ويمشوا إزاى او يفرق بينهم عن طريق آيه.

بدأت بوزير الداخليه هيمشى.... ها آيه النظام التحرير عامل آيه؟؟ الأعداد بتزيد يا سيادة المشير ... طيب نقول ان الحكومة كلها هتمشى ... ها آيه النظام التحرير عامل آيه ؟؟؟ الأعداد بتزيد يا سيادة المشير ... طب هنجيب البرادعى رئيس وزارة... ها آيه النظام التحرير عامل آيه؟؟؟؟؟ محافظات كتير ولعت يا سيادة المشير والتحرير عمال يزيد.

وطبعا الصفحة التانية من الكتاب انه يجيب الناس اللى مالهاش اى لازمة ولا اى دور غير انهم يصطادوا فى المية العكرة ويتكلم معاهم فى آيه مش مهم المهم ان الكتاب بيقول كده.

أعضاء المجلس ده مش فاهمين ان اللى فى التحرير ماحدش بيشتريهم ولا بيرشيهم ولا بيكسر عنيهم حتى لو فرقعوها بالباشا الجدع بتاعهم.

مش فاهمين ان اللى مش فى التحرير لاهو عبيط ولا أهبل علشان يصدق الاعلام الحكومى.

مش فاهمين ان وجودهم فى السلطة معناه خدمة الشعب مش تسخير الشعب لخدمتهم.

مش فاهمين ان وجودهم فى السلطة علشان يحموا الشعب لإن هما اللى فى إيدهم شرعية تطبيق القانون بقوة السلاح ومش عشان يستخدموه لفرقعة عينه ولا إغتياله علشان بيعترض على سياسته إللى هى مش موجوده أصلا.

مش فاهمين انهم مهما إغتالوا وضربوا وسحلوا وخربوا مش هيقدروا يخرسوا الناس اللى بتصرخ مطالبة بحقها انها تعيش فى بلدها معززة مكرمة آمنة مطمئنة على نفسها وعلى عائلتها.

مش فاهمين ان السلاح اللى فى إيدهم لو إستخدموه لفرض مصالحهم على مصالح الشعب فالشعب هيقطع إيدهم.

أنا مصري لكن مش لاقى مصرى اللى أعيش فيها كمصري.