الأربعاء، ديسمبر 21، 2011

أسئلة تاريخ ؟



* أذكر على الاقل عشرة ممن ظهروا فى الإعلام المتباكين على المجمع العلمى وهم لا يعرفون أن هذا المجمع موجود أساساً قبل الاعلان عن احترقه؟
* أذكر اسم متهم واحد فى قتل المتظاهرين المصرين منذ تنحى المخلوع وحتى الآن؟
* أذكر اسم متهم واحد تمت إدانته فى قتل ثوار 25 يناير؟
* كم مليما مصرياً تم إسترجاعه من المليارات المهربة والمسروقة؟
* أذكر نسبة ما تم إنفاقه على علاج مصابى الثورة مجتمعين منذ 25 يناير وحتى الأن وما تم صرفه لعلاج المخلوع؟
* أذكر كم شرطى قابتله فى حياتك كان قبل الثورة يعامل كل الناس بإحترام؟
* أذكر عدد الايام بعد الثورة التى رأيت فيها شرطى فى الشارع يقوم بماهمه الأساسية على أكمل وجه؟
* أذكر كم مرة قبل الثورة علمت أن الناس هم من يقبضون على اللصوص ويسلموهم للشرطة؟
* أذكر كم مرة بعد الثورة علمت أن الناس هم من يقبضون على اللصوص ويسلموههم للجيش؟
* أذكر عدد المغتربين الذين تعرفهم وكانوا يفكرون جدياً الرجوع الى مصر بشكل نهائى والعمل على تنمية هذه البلد والمشاركة فى بنائها بأية صورة ومهما كان الثمن فى الفترة بين 11 و 11 ونص فبراير ؟
* أوجد المعامل المشترك الأصغر والأكبر والوسطانى - بدون ذكر اللهو الخفى - للأحداث التالية ( موقعة الجمل / أحداث مسرح البالون / أحداث ماسبيرو / أحداث محمد محمود / أحداث مجلس الوزراء )؟
* أذكر الثمن الذى فى مقابله يمكن لشخص أن يضرب ويهان وينتهك آدميته بشكل سافر وسافل أو يموت؟
*أذكر الثمن الى فى مقابله يمكن لشخص أن يجلس أمام كاميرا ليقلب الحقائق ويخلط الأوراق ويرمى الناس بالباطل ويسخر من أطهار مصر؟
* أذكر كمية البرسيم المستهلكه من قبل توفيق عكاشة؟
* أذكر المادة المستنشقة من قبل خالد عبدالله؟
* أذكر عدد الكراسى اللازمة للأخوان والسلفيين لوضع مصر أولاً مع ملاحظة ان الكرسى بيشيل أربعة؟
* أذكر عدد الشهداء الذين إستشهدوا - خلال تأدية واجبهم تجاه الوطن وليس تجاه مصالح رؤسائهم- من الشرطة والجيش منذ 25 يناير وحتى الآن؟
* أذكر الجرائد التى تشعر أنك بحاجة للإحتفاظ بها كتاريخ -وليس لأى غرض آخر - لأولادك وأحفادك ليروا ما كنت تراه اليوم؟
* أذكر عدد الأصدقاء الذى حذفوك أو حذفتهم منذ 25 يناير وحتى الآن على مواقع التواصل الإجتماعى؟
* ما الفرق بين إختلاف الأراء وإختلاف الرؤية؟
* ما هو العامل المشترك بين الثورة والإستقرار - غير شارع امتداد رمسيس اللى يوصل العباسية بالتحرير- ؟


السبت، ديسمبر 17، 2011

الفدائيين

يوم 24 يناير المخلوع ونظامه كان فاكر كام واحد هينزل بكرة؟
يوم 6 ابريل 2008 كان فى عربية امن مركزى على كل ناصية، وأظهر أنه فعلا خايف من الناس. بس الناس مانزلتش. والنظام حس انه إتهز أونطه. فقرر انه ما يظهرش تانى انه خايف ولا فارق معاه اى دعوة لمظاهرة لإن ماحدش هينزل.
النظام كان عارف ان فى يوم ممكن يجى والبلد تفلت من إيده، وعمل حساب اليوم ده وحرق يوم 28 يناير بنظام ممنهج وبخطة موضوعة سلفاً مستندات ومقرات وأدلة، لإنه شاف ان اليوم ده جه.
طيب دلوقتى فى كام واحد مضمون نزلوهم الميدان لو تمت الدعوة للنزول؟
مش هحسب اى ظلم مباشر قبل 25 - ودول كتير جدا - تعالو نشوف حسابات من 25 يناير للنهاردة:-
* الارقام التقريبية للشهداء والمفقودين مجتمعين فى كافة الاحداث تقريباً 4000 شهيد ومفقود. ولو قولنا ان متوسط أقارب ومعارف الشهيد الواحد متوسط 30 شخص. يبقى بداية كده 120000.
* المصابين بقى حدث ولا حرج بمختلف الإصابات متوسط تقريباً 10000 بالإضافة الى أقاربهم ومعارفهم 310000.
يعنى الناس اللى لها حق أصيل فى الثورة وفى التغيير وفى الإعتصام المفتوح لحد ما حقهم يرجع واللى ضحواعلشانه بأرواحهم وبفقد أجزاء من أجسادهم 430000 مواطن مصرى.
* كل مواطن أصابه ضرر مادى أو معنوى بسبب تعمد الإنفلات الأمنى وتأثيره على الإقتصاد وعلى ضياع أرواح وممتلكات له الحق انه يعتصم ويطالب بمحاسبة المسئولين عن إدارة شئون البلاد طوال الفترة الماضية. لإن الشعب المصرى مش غنم يرعاه راعى يقرر متى وكيف يشاء ياكل ويشرب ويعيش. وإن المتصدر المسئولية لازم يعرف ان عواقب التخاذل او تعمد التراخى عن أداء الواجب له عواقب لازم يتحملها.
الطائفة دى من المتضررين هما كل المواطنين المصرين فى الداخل والخارج.
طيب يبقى مين اللى فاضل علشان اللجان الالكترونية وإإتلافات صوت الغالبية الصامتة والعباسية؟
هؤلاء فى نظرى مقسمين الى أقسام:-
- منتفعين بشكل مباشر منما - كانت - مصر عليه. ودول مش هيختفوا من البلد ولا هيبطلوا بكل الطرق انهم يبقوا النظام - القديم - على ما هو عليه.
- المتضررين من النظام السابق لكن مصدر معرفتهم الأساسى هو الاعلام الحكومى. ودول كل اللى ناقصهم انهم يصحوا الصبح يلاقوا حمدى قنديل أصبح وزير الاعلام لحد ما هو يلغى الوزارة بنفسه.
- كل من هو فى منصب هو ليس الأجدر به. الشبكة دى فيها من أكبر موظف حكومى الى اصغرهم. كل شخص فى المكان الغلط وعارف ان لو البلد مشيت خطوة واحد بس لقدام هو لازم يترمى من منصبه لإنه سبب فى إنها ماشية لورا. دول فى نظرى ضحية اكتر من إنهم جناة فى تجنيهم وكراهيتهم للثورة، بس لو دامت لحسنى مبارك كانت دامتلهم، كدة كدة مصيرهم استمارة 6.
اللى انا بستغربله جدا هو المجلس ليه ماعندوش الحسابات دى؟ أو ليه عنده وعامل نفسه مش شايفها؟ ولو متمسك بسياسة خليهم يتسلوا بتاعة حسنى. بلال فضل كان بيتكلم انه من مش منطقى انك تعادى جيل ثائر. جيل فيه من يفتدى البلد بدمه وروحه علشان البلد تنضف، ومن يفتديها بإستعدادة انه يضيع حياتة كلها فى بناية دولة مش هيجنى ثمار بنائها غير الجيل اللى بعده.
ان شاء الله متأكد من اليوم اللى بناتى هيفتخروا بأبوهم بإنه من فدائيين مصر سواء بروحه ودمه أو ببنائه لوطنه.