الجمعة، فبراير 23، 2007

يوم فى حياتى

بعد 25 سنة نفسى يبقى يومى بيعكس النتائج اللى حققتها فى حياتى. وساعتها وساعتها بس هعرف هل فعلا حققت من حياتى اللى كنت عايزه منها ولا ضاعت منى .
التاريخ : الجمعة 6 فبراير 2032
المكان : بيت فى مكان هادى على البحر فى مصر
تفاصيل اليوم:
5:00 صباحا بصحى وبصحى مراتى علشان نصلى الفجر. ونقرأ جزء من القرآن
6:00 بدخل على النت بشوف الجرايد والاخبار فى الوقت اللى مراتى بتشرف على تجهيز الفطار
7:00 بننزل على البحر نتمشى ونتكلم فى ذكريات البحر فى حياتنا
9:00 بكتب مدونتى الاسبوعية
10:30 باخد شاور للإستعداد لصلاة الجمعة
11:00 بقرأ سورة الكهف
11:45 الذهاب الى المسجد لصلاة الجمعة
13:00 بنكلم اولادنا نطمئن عليهم وعلى اولادهم، وبنكلم اهالينا واصدقائنا
15:00 بنطلع نتغدى على البحر
16:00 بنصلى العصر وبنام شوية ( اكيد العظمة كبرت ولازم نتستريح )
18:00 بنقوم نتمشى على البحر ونصلى المغرب
19:00 بنفكر لو هنسافر الشهر اللى جاى نروح فين ونعمل آيه هناك
20:30 بنصلى العشا ونختار فيلم نتفرج عليه
22:30نطلع على البحر ونشغل مزيكا هادية ونمسك إيد بعض ونبص للسما
01:00 ندخل ننام ونحمد ربنا على اليوم اللى عشناه واحنا مبسوطين وراضيين باللى عملناه فى حياتنا

الجمعة، فبراير 09، 2007

الإناء

فى اغلب الاوقات بقيم قرارتى قبل ما اتخذها. لكن الاسبوع اللى فات اخذت قرار قيمته بعد ما أخذته بشكل مختلف تماما عن تقييمى قبل ما آخذ القرار.
مشكلة القرار انى اعمل بمقولة يا بخت من بكانى وبكى عليا ولا من ضحكنى وضحك الناس عليا. خصوصا لما يبقى متعلق بشخص عزيز عندى جدا، بس ما فى اليد حيله قرار ولازم يطلع وينفذ خلال وقت قصير غير كافى لإدراك كل العواقب من اتخاذه.
فى حديث عن الرسول صلى الله عليه وسلم جزء منه ( إن لله عبادا إختصهم بقضاء حوائج الناس ) كتير كنت بقف عند الحديث وأحسن إنى واحد من الناس دول. بس مش عارف امتى هيجى عليا الدور وألاقى حد يقف معايا ويقضيلى حاجتى. بس الحمد لله ربنا بيكرم من عنده.
المشكلة ان صحبى ده انا وهوا عندنا نفس الاحساس ده، ومرة اتكلمنا فيه وما طلعناش بنتيجه مريحه فى النهاية، وفضلنا راضيين باللى ربنا قسمه لينا.
مش عارف ليه بيجلنا القدرة على مساعدة ناس كتير، ونقدر نأثر عليهم وعلى مستقبلهم بشكل ملموس، ومش بنقدر نعمل ده لنفسنا.
ليه ممكن توجد حلول كتير لمشكلة ما لحد ولما نقع فى نفس المشكلة بيحصل ان نعجز تماما عن التفكير فيها؟ ليه طالما بنمد إيدينا لناس كتير انها تطلع من خلالنا محدش بيعمل ده معانا، رغم إننا مش منتظرين ده من حد، بس يفضل سؤال ممكن يدور جوانا كتير من غير إجابة.
ليه ممكن لما نعمل حاجه كويسيه يطلع فيها 100 عفريت علشان يبوظها، ولما تلاقى حد بيعمل حاجه غلط ماحدش يفكر يقوله حتى انت بتعمل آيه.
كل منحاول نبنى حاجه تلاقى خماشر واحد عايزك تفشل، ولما تيجى تهد حاجه تلاقى مسانده من كل الناس. حتى اهالينا دخلو فى الدائرة دى، دائرة الناس اللى بتحاول من غير ما تشعر انها تهدم احلامنا وطموحاتنا.
المشكلة ان الواحد عنده حياة واحده يعيشها، حياة واحده يتعلم فيا ومنها، احسن حاجه طلعت انا وصحبى من الموقف اللى حصل لنا هو الاصرار ان مش هنعيش بعين حد، لازم نشوف الحياة بعينا حتى لو ده كلفنا اكتر وقت ومجهود وخسارة فى بعض الاحيان، بس هنكون احنا مش هما تانى.
فلا تبكى يا عزيزى الدوق على اللبن المسكوب فكلنا من نفس الإناء.

الثلاثاء، فبراير 06، 2007

ربنا يسامحكم ويسامحنى قبلكم

مشكلة بهظ معايا انه صديق عزيز وما أقدرش ارفض له طلب، حتى لو كان انى اكسر قانونى الخاص بالمدونة علشان خاطره. صحبى بقى. ولما الموضوع تطور ودخل مدونين جامدين زى The Lost Princess اصبح لا مفر
لما نشوف آخرتها
اية اللي حيحصل لايميلك لما تموت ؟
انا فكرت فى الموضوع ده - مش الايميل تحديداً- لكن فى الحاجات اللى هتحصل لما اموت - ولقيت ان ليا حاجات كتير على الانترنت مش بس إيميلات إشتركات وحركات كتير. ومن ساعة ما والدى توفى وانا معايا وصيته لحد دلوقتى فى جيبى من ساعتها قررت انى اعمل وصية فيها كل حاجه، مين ليه عندى فلوس واللى ليا عنده فلوس مسامحه فيها، مين مأمنى على حاجات وترجعله إزاى، كل حاجتى على النت ويعملو فيها آيه
اديت لباس وورد لحد قبل كده؟
آه مرة، كان النت قاطع عندى وفى حاجه مهمة عايزها من على الايميل. وطبعا غيرت الباس وورد اول ما النت رجع
لو اه كانت طبيعة علاقتك بيه اية؟
صحبى فى الشغل
اسمك؟
محمد بدرى على
اسم الدلع المشهور في وسط اصحابك؟
فى الغالب بدرى، وفى المنديات واماكن معينه هندس
عمرك؟
26
برجك؟
الميزان
مجالك او مجال دراستك ؟
الأثنين كمبيوتر
شخصيتك نوعها اية؟
إنسان عادى، بحب وبكره
السفر بالنسبة لك؟
السفر بالنسبة ليا متعة خاصة جدا اتمنى انها تدوم
س : المود بتاعك؟
ج : أنكر
وقت فراغك بتعمل فيه اية؟
بقعد لوحدى اسمع مزيكا
الاكلة المفضلة؟
الفراخ - الملوخية - المحشى - الممبار
الصفات اللي خدتها من بابا؟
كتير جدا، حتى الصفات اللى ما كنتش عاجبانى فيه لقيتها فيا
الصفات اللي خدتها من ماما؟
كتير واهمها ان الحياة وسيلة مش غاية
اكتر 6 حاجات بتكرهها؟
الوحده
الظلمة
الخوف
البتنجان
مدير غبى
الحَّر
اكتر 6 حاجات بتحبها؟
ربنا
حبيبتى
عائلتى
اصحابى
الوحدة
شغلى
الشغل بالنسبة لك؟
غاية علشان اقدر اوصل لهدف وبعدها ينتهى الشغل من حياتى واقدر اتفرغ لحاجات تانية اهم
اية الكومبيوتر والانترنت بالنسبة لك؟
شغلى، خيالى، عجينة فى إيدى بعمل بيهم اللى انا عايزه
عايزيني امرر التاج دلوقتي لحد؟
كل اللى اعرفهم فى عالم المدونات

الجمعة، فبراير 02، 2007

رفع القبعة

فى حياة كل إنسان علامات سابها ناس أثروا فيه بشكل او بآخر.
من اهم الناس اللى أثرت عليا وعلى حياتى د/ حاتم قوشتى. دكتور حاتم اتخرج من كليه الطب البشرى علشان يلبى رغبة أهله فى انه يكون دكتور، لكن هوا كان يميل على الكمبيوتر وعلومه فقرر انه ينفذ لأهله رغبتهم وينفذ هوا كمان رغبته.
درس علوم الحاسب فى لندن ورجع فتح شركة كمبيوتر فى القاهرة. كان منظم جدا فى شغله، منضبط جداً فى مواعيده، حازم جدا فى قراراته، طيب جدا على المستوى الشخصى.
اشتغلت مع الدكتور حاتم وانا فى أول الطريق فى الكمبيوتر ، كان مستغرب جدا انى بشتغل وانا فى السن ده ومش فارق معايا المقابل المادى، وكان بيحبنى جدا وعمره ما بخل عليا بعلومة سواء سألته عليها او اللى هوا يقوله لأنه عارف ان المعلومة دى مهمة ووقتها مش دلوقتى.
كان بيوصلنى كل يوم بعربيته لأقرب مكان ممكن اركب منه للبيت، وكان بيدينى إرشادات لليوم الجاى علشان استعد له.
فى يوم واحد فى الشغل ماسك كوباية شاى وجاى على المكتب بتاعى وقعت منه الكوباية ونزل منها شوية على هدومى. جريت على الحمام احاول انظفها بس البقعة ما طلعتش وسابت اثر على هدومى.
كنت مدائى جدا وبحاول اداريها بكل الطرق، واحنا مروحين وانا فى العربية الدكتور حاتم لاحظ ارتباكى، وانى حاسس بالإرتباك وان شكلى وحش انى همشى فى الشارع وبقعة الشاى على هدومى.
وقف بالعربية على جنب الطريق فى شارع زحمة، وقالى بص كده على الناس اللى فى الشارع وقولى شايف حاجه غريبة؟ بصيت عليهم وقولت له مالقتش حاجه غريبة عادى.
قالى لو ركزت هتلاقى ان كل الناس أخذو من عينك ثانيتين ثلاثه بالكتير، ونسيت شكلهم بعد كده، قالى تعرف ده معناه آيه؟!معناه ان كل واحد بيجى عليه وقت وبيحس انه محور ارتكاز الكره الارضية، وان الارض كلها بتلف حواليه، وتلاقيه مهتم بمظهره قبل اى حاجه، بشكله من برة اهم من شكلة من جوا. تسريحه شعره اهم من اللى فى راسه. مع انه فى الحقيقة مجرد ثانيتن او ثلاثه فى عين الناس. قالى تخيل انت ممكن تضيع من وقتك أد آيه علشان خاطر ثلاث ثوانى!!
قالى مهم انك تهتم بمظهرك لاكن الاهم انك تهتم باللى جوا مظهرك، لإن حياتك اهم من ثلاث ثوانى فى عين الناس.
يوم تانى كنت جايب معايا هارد بتاع واحد صحبى كان عايز اعمله فيه حاجه، دخلت على الدكتور وإستأذنت منه انى آخد الهارد بنفسى واطلع غرفه الصيانه واعمله بنفسى. رحب جدا وقالى خد وقتك والمعدات اللى محتاجها من غير ما ترجعلى. فى آخر اليوم سألنى خلصت اللى كنت بتعمله؟ قولت له الحمد لله. قالى هتاخد فى اللى عملته كام ؟ قولت له مش هاخد حاجه دا لواحد صحبى.
قالى وفيها آيه انك تاخد من صاحبك حق ما اشتغلت فى حاجته؟
قولت له اولا ده مش شغلى اللى باخد عليه فلوس، ثانيا انا بعمل كده لواحد صحبى مش لعميل.
قالى تعرف قبل كده واحد صحبى دخل عليا ومعاه واحد عايز رزمة ورق، وبعد ما بعتها للى كان معاه ومشيو رجع ليا صحبى تانى بعد خمس دقائق يسألنى على عمولته فى البيعه دى. قالى تعرف مكسب رزمة الورق كام؟ قولت لأ، قالى 50 قرش.
قالى خلى بالك من اصحابك لإن مش كلهم اصحابك لذاتك، فيهم اصحاب مصالح ولازم تعرف تفرق بينهم كويس، لإن الوحيد اللى هيخسر هوا انت مش اصحابك.
اتعلمت من الدكتور أن المبيعات مش فن تلاعب بكلمات، بل فن احترام العقول، وفن إظهار العيوب. حاجات كتير ليها مدلول فى الشعل وفى الحياة.
اتمنى ان يبتسم ليا الحظ والقى الدكتور حاتم ولو صدفة علشان اقدر اشكره، أشكر الراجل اللى علمنى حاجات كتير وليه عليا افضال مهما عملت مش هقدر اوفيله حقه.
الدكتور حاتم رجل بستحق إنى وبكل فخر ارفعله القبعة إحترما وتقديراً.