الجمعة، يناير 26، 2007

ممكن؟


كتير بحلم بحاجات كتير وفى الآخر أقول ممكن ؟
وانا صغير كان نفسى يكون ليا اصحاب فى العمارة كلها، وكبرت شوية وقولت نفسى يكون ليا اصحاب فى شارعنا كله، وكبرت تانى وقولت نفسى يكونوا فى مصر كلها، وكبرت تانى - كنت فاضى قوى زمان، عمال آكبر - وقولت نفسى يكون ليا اصحاب من كل الدول العربية.
نتجمع كل سنة فى بلد شكل، ننزل كلنا عند واحد من اصحابى فى البلد دى، يعرفنا على البلد وعلى عادتها وتقاليدها وناسها، وكتير تخيلت انهم كلهم فى مصر ونزلو عندى.
هفرجهم على آيه الأول؟ الهرم ولا النيل ولا الأوبرا ولا القاهرة بالليل ولا القلعة ولا حوارى الغورية والازهر ولا اوريهم المتحف الاسلامى ولا أوديهم المتحف المصرى ولا متحف محمد على ولا ولا ولا ولا ....................
بس إزاى هدارى زحمة الشوارع ، إزاى هدارى ووشوش الناس الطيبة اللى إتحفر فيها نقوش التعب واليأس ، إزاى هدارى منظر الأوتوبيسات اللى ينطبق عليها المثل ( لو تجرى جرى الوحوش الاتوبيس ما تلحاقوش )، هدارى إزاى منظر القهاوى اللى اتملت من خريجى الجامعات المؤسسين لشركة عطيل! ، هدارى إزاى منظر العيش اللى على الأرض والأحذية اللى فى البتارين.
قولت طالما انا هكون فخور وأنا بفرجهم على آثار ومعالم بلدى مش هخجل وأنا بقول لهم على مشاكل بلدى، بالعكس هكون فخور إنى بشارك ولو بدور صغير فى تغيير المشاكل اللى فى بلدى، مش بالكلام ولكن بالفعل، وهبقى فى قمة الفخر لما يجيى الدور تانى على مصر وأوريهم اللى إتغير فيها.
ياترى فى يوم هيتحقق حلم من احلامى ويكون ليا اصدقاء من كل الوطن العربى ، والحلم التانى إن يجيى الدور على مصر فى الزيارة واكون فخور بيها وقدرت أحل ولو جزء من مشاكلها؟ ممكن ؟!

الجمعة، يناير 19، 2007

صدق المشاعر


ربنا خلق جوانا كل المشاعر الحلوة والوحشة فى نفس الوقت، وساب لينا حرية استخدماها وطريقة الحياه معاها.
تلاقى الطفلة الصغيرة بتشعر بالأمومة تجاه عروسة مع إنها لسه بتقول على السكر اوكر، وتلاقى الولد حاسس بالغيرة من اخوة او اخته وهوا لسه من مواليد الشمعدان.
بس كل واحد ليه تعريفه الخاص بالمشاعر، كل الناس بيجى عليها وقت وتبقى سعيدة ولو لوقت قليل، بس صعب قوى تلاقى اثنين لهيم نفس التعريف للسعادة، تبقى آيه بالنسبة ليه.
كل الناس بتحب بس كل واحد شايف الحب بطريقه ممكن ما يلاقيش كتير بيتفقوا معاه فى نفس التعريف، علشان كده تلاقى اثنين بيحبو بعض بس مش متوافقين مع بعض فالعلاقة بينهم ما تنجحش فى المشاعر، وتلاقى اثنين لمجرد انهم متوافقين مع بعض فى المشاعر بس مش بيحبو بعض وتنجح العلاقة بينهم.
مش عارف ليه مش كل الناس بتفكر فى مشاعرها، هيا آيه وليه ويقدر يحافظ عليها إزاى. مقضيها وخلاص. والنتيجة ان الشعور الواحد ممكن يتغير على حسب الإنطباع العام عنده، اللى يفرحه ممكن يزعله واللى يخنقه ممكن يحسسه بالإنتصار, لخبطة جامدة تلاقيها عند ناس لخبطة لذيذة وليها طعم، وتلاقيها عند ناس تانية لخطبة تخنق وتخلى المشاعر تفقد مصداقيتها ويبقى احمد زى الحاج احمد فى كل حاجه.
اللى لقيته فى الموضوع ده ان اهم حاجه هو انه مهما كان احساسى فى اى وقت لازم احافظ على لمعانه جوايا واحتفظ بيه فى مكان بعيد عن اى حاجه ممكن تعكر صفوه، علشان يبقى عندى مشاعر عادية فى اوقات عادية، وعندى فى اوقات خاصة مشاعر صادقة صافية طالعه من القلب.