الجمعة، ديسمبر 29، 2006

الخوف

ما هذا الشعور الغريب الذى يكمن خلف الأماكن المظلمة؟ لماذا دائما هذا الشعور تجاه المجهول ؟ لماذا لا نستطيع ان نفكر فى فقدان شخص عزيز لدينا ؟ لماذا عند إقتراب الإمتحانات او المقابلات الشخصية للوظائف تشعر بزيادة ضربات القلب التى تقارب الإنفجار ! لماذا حروب اقيمت على اساس هذا الشعور؟ لماذا لا تخلو الجرائم من هذا الشعور؟ إنه حقا إحساس مدمر!!!! الخوف
لكن ما هو الخوف ؟
الخوف مرتبط بعدم المعرفة، قديما كان الناس تشعر بالخوف تجاه الطائرات، لإنها تجهل ما ورائها، وتسيطر عليه فكرة انه محلق فى الهواء بقطعه حديد فهو هالك لا محالة.
عندما تواجه خطراً فأنت لا تعلم ما سيحدث، فالعقل يستعد لمواجهة ما هو مجهول. فى الإمتحانات لا تعلم ماذا ستكون النتيجة، هل ستمر بهذا الإختبار مجددا ام انه ذهب بلا عودة. هكذا يفتح الخوف أبوابه إلينا، يأتى خلال كل ما هو مجهول او كل ما تحاول ان تجهل ما وراءه.
ان تفكر فى حياتك بدون شخص قريب مثل الوالدين، تشعر بالعجز فى هذه الحياة فتتوقف عن التفكير فتدفع بنفسك الى عدم معرفة ما راء هذه الاحداث، فيتملكك الخوف من التفكير او الاقتراب من حدوث هذا.
تخيل نفسك تستطيع ان تتخيل اى موقف وماذا ستفعل حينئذ.
من منا لا يخاف الموت؟ لكن هناك من مر بتجربة موت ونجى. حادث سيارة، نوبية قلبيه، ايا كانت التجربة لكن تجد هذا الشخص لا يخاف الموت بنفس الطريقة التى عاهدها قبل هذا الحادث. لإن جزء من عامل المجهول انتهى.
تخيل ان شخص عزيز لديك مريض وقد ينتهى اجله فى وقت قريب ماذا ستفعل؟ ستحاول الفكرة جاهدة ان تخرج من عقلك، لكن إن تمسكت بها وحاولت جاهدا ان تفكر فيها، قد ينتابك إحساس انك فقده بالفعل، وقد تبدأ بالبكاء الفعلى على رحيله. عندما تشعر بشئ لم يحدث بعد وتتفاعل معه هذا يعطيك القوة ان تفكر اكثر واكثر فيما سيحدث بعد ذلك، فعند محاولة التفكير فيها مجددا ستجدك اقل إنفعالا اكثر تركيزا، مع محاولات اكثر ستجدك بلا خوف من هذه اللحظة وانك تتصرف بشكل اكثر واقعية من مجرد الشعور بالخوف والعجز عن التصرف.
المعرفه والقرأة والتخيل اهم اسلحة مواجهة الخوف من المطلق ومن ما قد يحدث فى غفلة من الزمان.
صحيح ان الخوف مشاعر إنسانية هامة لكنها تحول الانسان الى ظلال إذا تملكته. عندما نحاول ان نهزم الخوف قد ننجح لكن دائما سنجد ما نجهله تماما فى حياتنا. لكن لن يعود هذا الشعور ليكون مدمرا بل قوة دفع للمعرفه. معرفه مما نخاف من الخوف

الجمعة، ديسمبر 22، 2006

شكــــــ جزيلاُ ــــراً

فى وقت بيجى على الإنسان بيستعرض فيه كل حاجه مرت عليه فى حياته كأنه شريط سينما. وبيمر عليه فى الشريط ده كل واحد قابله فى حياته، وبيفتكر اللى عملهوله.
قابلت ناس كتير جدا فى حياتى، ناس وقفت جنبى وساعدتنى بقصد او بدون قصد. ناس جرحتنى بقصد او بدون قصد. ناس حبونى لشخصى وناس حبتنى لمصالح شخصية. ناس ضحكتينى من قلبى وناس ضحكت على دموعى . ناس افتختر بمعرفتها وناس اتمنى ما اقبلهاش تانى فى حياتى ولو صدفة. ناس علمتنى بطريقة مباشرة او بطريقة غير مباشرة. ناس اتعلمت منى بطريقة مباشرة وغير مباشرة. ناس حبتهم من كل قلبى والظروف فرقت بينا. وناس حكم عليا الزمن بقربهم ليا ولو غصب عنى. ناس عروفنى المعنى فى القرآة وفتحولى مكتباتهم حباً فيا، وناس حاولت جاهدة وفشلت انها تدينى مكيفات برضه حباً ليا. ناس شمتو فيا فى اوقات المحن اللى عديت بيها. وناس فتحولى ابواب قلوبهم استخبى فيها من الطوفان. ناس مهما اتكلمت فى حقهم ما هوفى حقهم، وناس مجرد ذكر أسمائهم فى ذهنى درجه كبيرة ما يحلموش بيها.
كل الناس دى ليها الفضل بعد ربنا سبحانه وتعالى فى إنى اكون زى ما أنا دلوقتى، الوحش اللى فيهم قبل الحلو.
وعلى رأى الابنودى من الطين بيطلع الفل والياسمين.
الى كل هؤلاء اهديكم كل الورد واشكركم شكراً جزيلاً

الجمعة، ديسمبر 15، 2006

مانوع يستاذ




مرة كنت فى وسط البلد ، وكان فى وجود مكثف من الأمن المركزى الله أعلم ليه، وانا فى العربية وكنا داخلين شارع فرعى، لقينا عسكرى بيقولنا " مانوع يستاذ " اللى هى ممنوع يا أستاذ. قولناله طيب لو عايزين ندخل الشارع ده ندخله منين ؟ قالنا مانوع يستاذ. قولناله طيب فى طريق تانى للشارع قال مانوع يستاذ وكأنها الكلمة الوحيدة فى قاموسه. قولت هيا جت عليك، إشمعنى انت اللى مش هتقول ممنوع ،لقيت فعلا ان الجملة دى مستخدمة كتير جدا فى قاموس ناس كتير وعلى مستويات كتير:-
مانوع يستاذ نتكلم فى الجنس، أياً كانت الطريقه والهدف من الكلام ده والنتيجة " إيناس الدغيدى "
مانوع يستاذ ننتقد رؤسأنا بشكل مباشر وأياً كان رئيس آيه والنتيجة " العيش كبير والعيشة حلوة وربنا يخلى سيادة الرئيس "
مانوع يستاذ تحلم بمستقبل افضل بعد ما تتخرج، لإن اللى اتعلمته حاجه والشغل حاجه تانية والنتيجة " مندوب مبيعات "
مانوع يستاذ نختلف فى رآئى فى الدين، لإن اسهل حاجه تتقال انك جاهل او كافر والنتيجة " اتصل على 19××× وتجيلك الفتوى هوا انت لسه هتتعب وتدور"
مانوع يستاذ نجتمع نناقش موضوع علشان نوصل لحل، لإن إتفقنا أللا نتفق والنتيجة " كل واحد ينام على الجنب اللى يريحه"
مانوع يستاذ يكون ليك صداقات مع الجنس الآخر، لإن محدش فاهم يعنى آيه صداقة والنتيجة " جواز عرفى "
مانوع يستاذ تتشرى كتاب، لإنك ليه تفكر أكتر مع انك ممكن تفكر أقل والنتيجة " اللمبى "
مانوع يستاذ تتجوز اللى بتحبها، لإن المجتمع فرض ان الحب مشاعر ما تأكلش عيش والجواز قسمة ونصيب والنتيجة " مجتمع مزيف "
مانوع يستاذ تقول صوتك فى الإنتخابات، لإن كدة كدة الحكومة بتعمل اللى على مزاجها والنتيجة " مات الرئيس عاش ابن الرئيس "
مانوع يستاذ مانوع يستاذ مانوع يستاذ والى مش مانوع يستاذ هوا انك تسمع دائما مانوع يستاذ

الجمعة، ديسمبر 08، 2006

بين المطرقة والسندان




كثيرا ما يواجه الإنسان اوقات تحاط أحلامه بين المطرقة والسندان، بين ظروفة التى لم يختار منها شئ، وبين إمكانياته التى استطاع ينميها بقدرة الله عز وجل اولا واخيرا وبإمكانياته التى صنعها لنفسه.
كثيرا ممن شاءت أقدارهم ان يصلو لهذه النقطة خسروا الكثير من احلامهم بسبب ظروفهم، ومنهم من استطاع ان يأقلم إمكانيته لمواكبة الظروف التى يمر بها. لكن السؤال الأهم لماذا ؟
فى كثير من الدول العربية يواجه الشباب تلك المرحلة بشتى طرقاتها ومحتواياتها.
فى مصر وكثير من الدول العربية يواجه الشباب التجنيد الإجبارى بعد إنتهاء الدراسة وكأن فترة التجنيد هى عقاب على إنتهاء الدراسة.
فى العراق وفلسطين يواجه الشباب ظروف سياسية لم يختار منها شئ، فمن الممكن ان يستيقظ الشاب متوجهة الى عمله ليجده اصبح مدمر بالكامل او يتم إعتقاله بتهمة لا يعرف عنها شئ.
فى لبنان أحزاب سياسية تتصارع من اجل إثبات القوة المطلقة والخاسر الوحيد هو الشباب.
فى دول الخليج تتحكم العادات والتقاليد مقاليد الحكم والإدارة، فالعمل ليس مكفول للأكفاء فقط بل تدخل طرقات اخرى ليس لشباب بها سبيل فى تطوير نفسه من خلالها.
دول المغرب العربى وتونس والجزائر مشكلة الهوية بين العرب والغرب، مشكلة تصارع الثقافات وقتال الحضارات الدائر من تحت السطح يدمر الكثير من احلام الشباب.
الكثير والكثير من المطرقات والسندان فى الوطن العربى، ودائما يلقى الكاهل على الشباب وان الحكومات ليست المتسبب الوحيد فى كل هذه المشاكل وان على الشباب المشاركة فى حلها.
ويأتى الشباب بالأفكار وبالجمعيات الأهلية الغير حكومية لتجد مطرقة الحكومات وسندان الإمكانيات لكى يتم إبطال مفعولها الحقيقى وهى القدرة على توجيه الشباب الى طرق افضل.
مملة هى الحياة التى لا تنتهى ابدا من كونها بين المطرقة والسندان.

الجمعة، ديسمبر 01، 2006

بعد منتصف الليل




ناس كتير بتصحى من النوم من بعد الفجر لحد الساعه8 او 9 صباحاً، يا إما راحين شغلهم او مدراسهم او الجامعات .. الخ
اللى بيحصى بعد التوقيت ده بيكون رايح شغله اللى فى الغالب شغل فى شركات قطاع خاص وهكذا.. لكن اللى بيصحى من النوم الساعه 1 صباحا دا اكيد عايش فى النص التانى من الكرة الارضية، ابو السعود واحد من الناس اللى عايش فى النصف الآخر من العالم، العالم اللى كنت بسمع عنه لكن عمرى ماشوفته ولا قربت منه.
ابو السعود بيشتغل بمنطق اللى فى المهنة موسيقى، وبمنطق اللى برة المهنة عازف، وبمنطق الكار ( اصحاب المهنة الواحدة ) لاعيب توره.
بشتغل فى ملهى ليلى عازف إيقاع، قابلته على ملتقى الفنانين ( قهوة فى وسط المدينة ) بيقعد عليها اهل الكار كل واحد فى انتظار دورة فى الرحيل الى شغله. لقيت ناس اول مرة اشوفهم وبسمع كلام اول مرة اسمعه وحسيت بأحاسيس اول مرة احس بيها. كأنى فجأة إنتقلت الى النص الآخر من العالم فى غمضة عين.
طبعا ماكنتش لوحدى وكان معايا واحد يعرف ابو السعود وعلى صلة بالعالم الآخر، رحب بيا ابو السعود ترحاب كبير كأنه يعرفنى من زمان ولاحظ انى مش بشاركهم الحديث، بصراحه نص كلامهم مش فاهمه فقالى انت فى حد مزعلك فى البيت ؟! إستغربت قوى من السؤال وخصوصا ان اللى قاعدين معانا ضحكو من السؤال، فقولت له لأ، قالى طيب ما تعمل تحليل!! قولت له تحليل آيه؟ قالى تحليل دموع وضم حواجب. فعرفت انهم هيستلمونى تسلية القعدة لإنى الوحيد اللى مش فاهم اى حاجه من المصطلحات ولا طريقة التعبير عن اى حاجه، حتى صحبى عرفنى ليهم فى جملة غريبة جدا( السرين داين فى الدهشان ) كل الناس فهمت إللا انا.
لاحظت ان فى بنات دخلت على القهوة وان الساعه عدت 3 صباحا فسألت ابو السعود عنهم فقالى دول لسه جايين منتظرين ميعاد شغلهم.
ولما سألت ابو السعود على طريقة حياته قالى بالتفصيل على البرنامج اليومي للعايشين فى النص التانى من العالم:
بيصحى من النوم 1 صباحا وينزل من البيت على 1:30 او 2 بالكتير
يلف بعربيته ياخد باقى افراد الطاقم ويطلع على القهوة على 3:30
يصطبح مع الفرقه ويشوف ميعاد شغله الساعه كام اللى فى الغالب 5 صباحا
يشتغل ساعتين تلاته ويطلع يجيب التموين على الساعه 7 صباحا
يلف يشوف أخبار باقى الزملاء لحد 10 او 12 الظهر
لو فى بروفات للفرقه بيعملوها من 1 لحد 3 او 4 عصرا
وبعد كده يروح علشان يلحق يصحى 1 صباحا
حيست انى بتفرج على اليس فى بلاد العجائب، كل حاجه غريبة وجديدة حتى المكيفات هناك شئ عادى جدا كأنها مياة معدنية على كل ترابيزة.
ابو السعود لما لاقنى خارج نطاق الخدمة قرر يساعدنى فى فهم اللوغرتمات اللى شايفها.
قالى ان القهوة دى المكان اللى بيتجمع فيه ( الفنانين ) قبل ما يروحو شغلهم اللى بيدأ فى الغالب بعد 2 صباحاً فى الملاهى الليله. وان فيهم الطبال والأتى وعازف الاورج والمطربين والراقصات حتى اللى بيشيلو العدة بتلاقيهم على القهوة دى.
كل الناس بتضحك بشكل متواصل وكأنهم اسعد ناس فى الأرض، لما سألت مسعد علي الموضوع ده قالى اللى انت شايفهم دول اكتر ناس مش طايقه نفسها فى الدنيا، ومحدش فى الشغلانه دى راضى عن اللى بيعمله ونصهم بينكر شغلته دى قدام اهله واصحابه. بس مالهمش باب رزق تانى غير ده.
وقالى ان الكار بتاعهم دخلت فى مشكلة العمالة القادمة من الخارج، وقالى كل محافظات مصر ودول تانية جنب مصر ناس منها جم مصر يشتغلو فى المهنة دى على اساس انها اسرع طريقة تجيب بيها فلوس فى البلد. وقالى ان شغلته الاساسية لحام لكن طبعا مافيش وجه مقارنه بين ربحه من شغلته كعازف وبين انه لحام.
شوية ودخل واحد لابس جلبية وشنبه واخد نص وشه، ابو السعود قالى ده صاحب القهوة، كان طباخ لحد من الناس الكبار فى البلد زمان. وقالى ان العمارة اللى فيها القهوة بتاعته وقالى تعالى اوريك حاجه غريبه. خرجنا بره القهوة وورانى عربية موديل 2006 شكلها جامد جدا قالى انها عربية صاحب القهوة كل سنة بيجدد عربيته وما بيركبهاش، مجرد انه عنده عربيه وخلاص، وقالى انه معين واحد ياخد باله من العربية ويغسلها كل يوم وما يخليش حد يجي جنبها.
دنيا تانية وناس تانية عايشين معانا واللى نعرفه عنهم مجرد نظرات استنكار واستحقار لأسلوب حياتهم، بس مهما الناس بصو لهم هيفضلو عايشين ولو فى النص التانى من العالم بعد منتصف الليل.

الجمعة، نوفمبر 24، 2006

2.75


مرة كان عندى يوم شغل طويل جدا، ورجعت البيت متأخر قوى ونمت اول ما دخلت البيت مباشرة. صحيت تانى يوم بعد ما فطرت حبيت اشرب سجارة، لقيت مامعيش سجاير. فقولت انزل اشترى، لقيت مش معايا اى فلوس نهائى. فضلت افكر إزاى مافيش فى جيبى اى فلوس، وقعد احسب اللى عملته اليوم اللى قبله، لقيت انى صرفت كتير جدا وانى بطبيعتى مش باعد الفلوس اللى معايا مجرد اشوف الفلوس هتقضى اللى عايزة وخلاص، وانى لما حاسبت التاكسى طلعت الفلوس وادتهاله وما شوفتش معايا فلوس تانى ولالأ.
كنت عارف انى جايلى فلوس بالليل لكن انا عايز اشترى سجاير دلوقتى، فضلت قاعد متكدر ومضايق مش لإنى عايز اشرب سجاير لكن لمبدأ ان إزاى مش معايا فلوس.
على الساعه 8 مساءا جالى العميل ودفع مبلغ كبير باقى الحساب اللى بينا، بعد ما مشى بصيت للفلوس كده كتير قوى، حسيت ان قيمة المبلغ الكبير ده لا يتعدى 2.75 قرش ثمن نوع السجائر اللى بشربه. ولقيت الباقى مالوش اى لازمه فى الوقت ده.
من ساعة الموقف ده فضل رقم 2.75 قرش مرتبط فى ذهنى بقيمة الفلوس، وان الفلوس اللى معايا لو تساوى 2.75 قرش بمعنى انها مغطية إحتياجاتى يبقى كده تمام جدا مهما كان معايا كام، و مهما كان معايا ومش مكفى اللى انا عايزة يبقى اقل من 2.75 قرش.
بيجى فى تفكيرى كتير موقف لو اثنين فى الصحراء، واحد معاه مليون جنية فلوس والتانى معاه اكل وشرب قميتهم 100 جنية، تفتكر مين اغنى من مين؟ وليه ؟ الفلوس مش ورق لكن قيمتها فى اللى بتعمله بيها. شوفت ناس مرتبتها فى الشهر لا تتعدى 300 جنية ومتجوزين وعندهم طفل او اثنين وفاتحين بيت ليه مصاريف وعايشين مبسوطين جدا وحاسين ان ما فيش اى شئ ناقصهم، فى حين ان فى ناس تانية معاها فلوس كتير جدا ودائما حاسين ان فى شئ مهم ناقصهم. الفلوس فى حد ذاتها مش غاية واللى بيعتبرها كده بيتحول الى شبه إنسان.
الحمد لله معايا 2.75 قرش ربنا يباركلى فيهم ويحفظهم من الزوال.

الجمعة، نوفمبر 17، 2006

التغير هو الثابت الوحيد




لما تلاقى ان مافيش حاجه بتفضل على حالها ولازم كل شئ يتغير، صحيح ساعات بيتغير للأحسن بس كتير بيتغير للأسواء.
صديق عزيز عليا جدا توفاه الله من يومين، وفاته خليتنى افكر فى حاجات كتير بمنظور جديد شوية. منظور ان التغير هوا الثابت الوحيد فى الحياة.
صحبى محمد كان فى آخر سنة فى كلية الهندسة مدنى، مأساة حياته مالوش ذنب فيها، وهوا فى الاعدادية كان عيان والدكتور كتبله على دواء به نسبة كورتيزون اكبر مما يتحملها جسمه. الدواء ده اثر عليه تأثير كبير وعمله مشاكل فى العظم وخصوصا فى الركبة. محمد عاش مع الموضوع بمنظور الحمد لله انها جت على أد كده ومحدش عارف الخير فين. ومع تطور المرض مع وصوله للجامعه بدأ يمشى بعكازين وكان لازم يطور من رؤيته للمشكلة وبدأ يبص ان ليه نواحى إيجابيه. وكان بيقولنا انه كده مش هديخل الخدمة العسكرية وانه هيشترى عربيه بتخفيض يصل لـ 50% من ثمنها لإنه فى حكم المعاقين، وانه لما يخلص جامعه هيعمل عمليه تركيب ركبتين صناعيتين بيتغيرو كل 15 سنة، وكانت ليه خطط فى الحياة كبيرة قوى وطموحه جدا، ولما كانت تكاليف العمليه كبيرة بدأ محمد فى انه يدور على جهات ممكن تساعدة فى تكاليف العمليه، وبدأ فى انه يشتغل فى شركة مقاولات صغيرة علشان يكمل على مصاريف العمليه.
كان بيمشى بعكازين لكنه كان نشيط جدا فى الشغل وكان بيطلع على السقاله الخاصه بالعمال فى المبانى يباشر عملهم. ماكنش فى حاجه تقدر توقفه عن هدفه حتى لو كان مستحيل بالنسبة لظروفه. ربنا وفقه وقدر انه يوصل للسنة النهائية للجامعه بمجهود كبير جدا منه فى الدراسة والعمل. كان محبوب جدا من كل الناس اللى عرفوه، عمره ما زعل حد منه ولو بنظرة، وعمره ما عمل فرق بينه وبين اى حد مهما بلغت درجته. وكان دائما باشوش فى وجهة الناس وفى اصعب المواقف تلاقيه مبتسم ومقبل على الحياة.
ووصل لوقت العمليه اللى تقرر عملها اسرع نظرا لتدهور حاله الركبتين تماما وانه لازم يعملها فى اسرع وقت.
وللمرة الثانية يتدخل الطب فى حياة محمد مش علشان يساعده لكن علشان يكون سبب فى انه ينهى عليه، توفى محمد فى غرفة العمليات بعد ما خرج الدكتور يقول ان العمليه نجحت ، جاله استعداء تانى لغرفة العلميات يخرج منها يقول البقاء الله. فى لحظة امتلكتنا قمة السعادة تحولت على قمة الحزن.
للأسف محمد استطاع انه يتغلب على كل الصعاب اللى قابلته لحد ما قرر القدر ان فى اكتر من كده.وهيفضل الثابت الوحيد هوا التغير فى حياة محمد وفى حياتنا كلنا.


الفاتحة على روح محمد عبد النبى

الجمعة، نوفمبر 03، 2006

صمت الخرفان

لما نلاقى ان 80% من اغنياء العالم بدأو من تحت الصفر بسبعه تمنية كيلو على الاقل ونلاقى ان اكتر من 90% من الشباب على مستوى الوطن العربى قمة هدفه انه يبقى غنى بغض النظر عن إزاى وليه – حسب الإحصائيات المعتدة من مركز الاحصاء الدولى 2007- يبقى أكيد فيه حاجه غلط.


 طيب تعالى نشوف واحد من الـ 80% دول. واحد فى دولة ما مش لاقى ياكل، ولاد الحلال قدرو انهم يعلمه السواقه وشغلوه على تاكسى.


الراجل دا بعد اول اسبوع شغل ليه على التاكس بدأ يفكر إزاى يبقى صاحب تاكسى،بدأ فى توفير أجرته بقدر الامكان لمدة سنتين ودور على كل معارفه انهم يسلفوه الجزء اللى فاضل على مقدم تاكسى بالقسط.



وبعد سنيتن ونص بقى صاحب تاكسى، وفضل يفكر إزاى يبقى عنده موقف لحسابه ويكون عنده 5 عربيات تاكسى. جاب واحد يشتغل على التاكسى بتاعه وهوا اشتغل على تاكسى تانى وفضل على الحال ده 3 سنين، وبقى عنده 6 عربيات تاكسى. فمن شحات لواحد صاحب 6 عربيات تاكسى أخذ فى التفكير والتنفيذ والتعب 5 سنين ونص.



 وقف على كده ؟! لأ إزاى فى خلال سنة ونص كمان بقى عنده 16عربيه تاكسى بيشتغلو لحسابه، وبعد 6 سنين اشترك فى شراء طياره وبعد 4 سنين بقى واحد من اكبر اصحاب شركات الطيران .



كل ده فى وقت آد آيه؟؟ تقريبا 17 سنة من تحت الصفر  لواحد من اغنى اغنياء العالم.



 صباح الفل على الناس اللى مش بتتكلم وبتشتغل بجد، صباح الناس اللى الناس كانوا بيقال عليهم خرفان فى الحياة ، اللى بصمتهم قدروا يكون علامات فى الحياة.



 مشكلة الراجل ده زى مشكله ناس كتير بدأو بنفس الطريق، ان المشكلة مش فى الفلوس المشكلة فى الدماغ.



كتير قوى اختارو طريق الكلام، كلام الجدعان. وفى ناس اختارت الصمت، صمت الخرفان لكن فى النهاية اللى بيقدر يحسم الخلاف بين الصمت والكلام هوا اللى بيبان.

الجمعة، أكتوبر 27، 2006

دورات للحب

Based on true story

ليماء باصه على الكمبيوتر ومشغلة الماسنجر بقالها يومين. حاطه عنيها على اسم معين مستنياه يدخل على النت samir_love2000 ، كل ما تحس انها غفلت شويه تكتب له رساله ليكون دخل وخرج وهيا ما شافتوش.
ليماء تتصل بشيماء جارة سمير ...

ليماء : شيماء ما فيش اخبار عن سمير ؟
شيماء : لا، محدش شافه من يومين وهما عارفين انه ساعات بيغطس وبيظهر بعد يومين تلاته!

لمياء : ايوه بس كان بيقولى هوا فين وبيكلمنى على التليفون كل يوم يطمنى عليه !!!!

شيماء : صدقينى لو عرفت اى حاجه هتصل بيكى على طول

لمياء : معلش بتقل عليكى بس ابقى اسألى عليه فى البيت، يمكن يكون رجع وراحت عليه
نومه ولا حاجه. وبعدين سحر اخته صحبتك وممكن تسأليها عنه.

شيماء : طيب ما انا بقالى يومين كل شوية بسألها لحد ما زهقت منى وقالتلى اول ما يجيى هقولك.
لمياء : معلش اسألى عليه تانى دلوقتى يمكن يكون وصل وهيا اتشغلت بحاجه ونسيت تقولك !

شيماء : بطلى بقى القلق ده هوا مش صغير، وبلاش تخلى شكلى وحش قدامهم.

ليماء : شكلك وحش ؟! انا بموت من قلقلى على سمير وانتى خايفة يكون شكلك وحش .. أوف

لمياء تقفل التليفون فى وش شيماء بعصبيه وترجع تبص تانى على الماسنجر فى إنتظار سمير.. والدة لمياء دخلت عليها الغرفه وقالت لها ..
الأم : لحد امتى هتفضلى قاعده كده قدام الزفت ده مش بتعملى اى حاجه وحتى بتاكلى وتشربى قدامه، فى آيه الزفت دا مخليكى مرزوعة قدامه ؟!!
لمياء : ماما بقولك آيه انا عفاريت الدنيا بتتنطط قدامى سيبنى لوحدى دوقتى، وبعدين هقولك على كل حاجه.

لمياء تدير وجها ناحية الكمبيوتر لتجد شاشة محادثه وعنوانها samir_love2000 مكتوب فيها ...

Samir_love2000 : إزيك

Lamya2_sam2000 : سميييير
Lamya2_sam2000انت فين يا حبيبى :
Lamya2_sam2000كنت هموت من كتر قلقى عليك:
Samir_love2000 وحشتينى :

Lamya2_sam2000 : حبيبى انت اكتر

Lamya2_sam2000 : انت كنت فين وبقالك يومين مش بتتصل بيا ليه؟

Samir_love2000 : سامحينى اتشغلت عنك

Lamya2_sam2000 إتشغلت عنى؟ :
Samir_love2000: معلش ما عنديش وقت كتير اشرحلك
Samir_love2000: بس قريب جدا هتعرفى وتقدرى
Samir_love2000: وصدقينى مافيش حاجه هتفرقنا تانى
Lamya2_sam2000: سمير انت كلامك غريب ليه كده
Lamya2_sam2000: سمير انت فين يا حبيبى؟
Samir_love2000: قريب جدا هنكون لبعض ومافيش حاجه تفرقنا
Lamya2_sam2000: سمير انا خايفة تبعد عنى تانى
Samir_love2000: حبيبتى خلاص مافيش خوف من حاجه تانى
Samir_love2000: عايز تعرفى انى بحبك مهما حصل

موبيل لمياء بيرن ..
لمياء :الو مين
شيماء : انا شيماء يا لمياء

لمياء : آه حبيبتى معلش إنفعلت عليكى فى التليفون بس غصب عنى، انتى عارفه انتى صحبتى قد آيه، وعارفه انا بحب سمير قد آيه
شيماء : عارفه كل ده، بس مش عارفه اقولك آيه دلوقتى

لمياء : ما تقوليش حاجه يا حبيبتى خلاص إن شاء الله مش هزعلك منى تانى، وهخلى سمير ما يتأخرش تانى
شيماء : لمياء بلاش الكلام ده

لمياء : سمير وعدنى انه مش هيسبنى تانى ابدا
شيماء : حبيبتى بلاش تقولى كده، ما تعمليش كده

لمياء : معلش يا حبيبتى مش هاقدر اكلمك كتير سمير مستنينى على الشات

شيماء وبدأ صوتها يعلو فى الاختناق : لمياء انا اكتر حاسة بيكى بس بلاش تعملى كده فى نفسك
لمياء : انا عارفه انك مش موافقة على سمير، بس لما تعرفيه على حقيقته هتحبيه زيى ويمكن اكتر
شيماء : لمياء كفاية كده، لازم تبقى اجمد من كده

لمياء : بقولك آيه انا لازم امشى علشان سمير ما يزهقش

شيماء : لمياء كفاية كده حرام عليكى انتى بتقطعينى بكلامك ده. سمير مش على الشات

لمياء : بقولك آيه بطلى استعباط، صحيح انا زعلتك بس ما يرضكيش سمير يزعل منى .
شيماء : لمياء انتى عارفه سمير معزته عندنا كلنا اد آيه، ودا معناه انه هيفضل فى قلوبنا علي طول.

لمياء: شيماء انتى بتقولى آيه، بطلى بقى سمير معايا على الشات.
شيماء : سمير مات يا لمياء .

لمياء: هههه انتى فعلا مجنونه، انتى بتغيرى منى للدرجه دى علشان سمير بيحبنى انا ومش يحبك انتى. ما كنتش فاكرة ان توصل بيكى الغيره انك تقولى عليه كده

شيماء : غيرة آيه يا لمياء، سمير مات فى حادثه اول امبارح ووالده راح يجيبه وابويا راح معاهم المستشفى.
لمياء : بقولك آيه انا مش مستعدة اسمع الكلام الفارغ ده، سمير معايا ، وطالما الغيرة وصلتك لكده انا مش عايزه اعرفك تانى.

لمياء تغلق التليفون بعصبية وترجع لسمير

Lamya2_sam2000: تخيل يا سيمر شيماء من كتر غيرتها منى بتقولى انك مت

Samir_love2000:

Samir_love2000:

Samir_love2000:

Samir_love2000:

Samir_love2000:

Lamya2_sam2000: سمير انت خليت الخط ابيض ولا لآيه، مش شايفه انت بتقول آيه

Samir_love2000:

Samir_love2000:

Samir_love2000:

Lamya2_sam2000: سمير انت فين دلوقتى

Samir_love2000:

Lamya2_sam2000: سمير رد عليا انت مش بتكتب ليه

Samir_love2000:

Samir_love2000:

Samir_love2000:

Samir_love2000:

Lamya2_sam2000: سمير رد عليا

Samir_love2000: لمياء انا بحبك وما اقدرش استغنى عنك

Lamya2_sam2000: حبيبى وانا كمان، انت فين دلوقتى

Samir_love2000: معاكى

Lamya2_sam2000: ايوه يا حبيبى عارفه بس انت بتكتبلى منين

Samir_love2000: من جواكى


تلاحظ لمياء ان Samir_love2000 مش اون لاين فى الماسنجر

Lamya2_sam2000: سمير انت مش اون لاين ليه، انت مش ظاهر نفسك ليه

Samir_love2000: حبيت اسلم عليكى واقولك ان قريب مافيش حاجه تفرقنا

Samir_love2000: حبيت اسلم عليكى واقولك ان قريب مافيش حاجه تفرقنا

Samir_love2000: حبيت اسلم عليكى واقولك ان قريب مافيش حاجه تفرقنا

Samir_love2000: حبيت اسلم عليكى واقولك ان قريب مافيش حاجه تفرقنا

Samir_love2000: حبيت اسلم عليكى واقولك ان قريب مافيش حاجه تفرقنا

Lamya2_sam2000: سمير انت بتخوفنى بكلامك ده انت فين

والدة لمياء تفتح الباب وهي غرقانه فى العياط
الام : حبيبتى انتى مش هتيجى معانا ؟

لمياء : آجى فين؟ وانتى بتعيطى ليه ؟

الام : حبيبتى ما تعمليش كده فى نفسك

لمياء تنفجر فى الصراخ : هوا فى آيه مالكو عمالين تقولولى كده ليه هوا انا مجنونه

الام : حبيبتى دا قدر ربنا واحنا مالناش اعتراض عليه

لمياء : حرام عليكو كده، انتوا عايزين منى آيه ؟

تخرج الام وهيا فى شدة البكاء والحزن
تعود لمياء سريعا الى الكمبيوتر لتجد

: حبيت اسلم عليكى واقولك ان قريب مافيش حاجه تفرقنا

: حبيت اسلم عليكى واقولك ان قريب مافيش حاجه تفرقنا

لمياء حطيت إيدها على بقها خايفة لحسن الصرخة تخرج من جواها ...

حبيت اسلم عليكى واقولك ان قريب مافيش حاجه تفرقنا سمعتها بودنها ولفت تلاقى سمير واقف واراها مبتسم ومادد آيده ليها .......

موبيل شيماء You Have Received 1 New Message تدوس على Show تلاقى الرساله
شيماء سامحينى اسأت الظن بيكى

مش عايزاكى تزعلى منى ابدا انا

وسمير مافيش حاجه هتفرقنا

Sender: +00000000000000

Sent: 00:00:00

00-00-0000

شيماء بصت على صورة لمياء وقالتلها واحشانى قوى. الفاتحه على روحك انتى ,وسمير ...............................


الجمعة، أكتوبر 20، 2006

كل سنة وانتم

كل سنة وانتم طيبين
كل سنة وانتم عايشين، مش مهم إزاى المهم عايشين
كل سنة وانتم فى سلام، مش مهم سلام آيه لكنه سلام
كل سنة وانتم مبسوطين، مش مهم مبسوطين من آيه لكن مبسوطين
كل سنة وانتم أحرار، مش مهم تكلفة الحرية آيه لكن أحرار
كل سنة وانتم سعداء، مش مهم سعداء بأنهى طريقة لكن سعداء
كل سنة وانتم متجوزين، مش مهم ( اللى بالى بالك ) لكن متجوزين
كل سنة وانتم فى تقدم، مش مهم تقدم لورا ولا لقدام لكنه تقدم
كل سنة وانتم فى ديمقراطيه، مش مهم رأيك لكنها ديموقراطية
كل سنة وانتم متعلمين، مش مهم تعليم ولا متعلم عليكم لكن متعلمين
كل سنة وانتم متكيفين، مش مهم نوع المزاج لكن متكيفين
كل سنة وانتم عاقلين، مش مهم النتائج لكن عاقلين
كل سنة وانتم متفتحين، مش مهم فاتحين فين لكن متفتحين
كل سنة وانتم مستقرين، مش مهم لو فى الشارع المهم مستقرين
كل سنة وانتم ناجحين، مش مهم نجاح وراه آيه لكن ناجحين
كل سنة وانتم مرتاحين، مش مهم راحه ولا إستراحه المهم مريحين
كل سنة وانتم صابرين، مش مهم صابرين ليه المهم صابرين
كل سنة وانتم شغالين، مش مهم المرتب المهم شغالين
كل سنة وانتم مبدعين، مش مهم تبقى على القهوة لكن مبدعين
كل سنة وانتم مبتسمين، مش مهم من القلب ولا مجامله لكن مبتسمين
كل سنة وانتم بتعملو خير، مش مهم اللى بيمصلح لكنه عمل خير
كل سنة وانتم فاهمين، مش مهم دماغك تكلك المهم فاهمين
كل سنة وانتم متفرجين، مش مهم على آيه المهم متفرجين
كل سنة وانتم متاحبين، مش مهم آخرة الحب آيه لكن متحابين
كل سنة وانتم متجمعين، مش مهم تفاهة القعدة لكن متجمعين
كل سنة وانتم اصدقاء، مش مهم يبيعك لكن تفضلو اصدقاء
كل سنة وانتم مستعبطين، مش مهم ليه لكن مستعبطين
كل سنة وانتم مدونين، مش مهم لمين وليه لكن مدونين
من الآخر كل سنة وانتم زى مانتم قارئين

الجمعة، سبتمبر 29، 2006

الحرب والسلام

قررت الحرب وقرر السلام ان يعقدا هدنة، وقرر كل منهم ان يدعو الى هذا الاجتماع الأطراف التى تقف الى جانبه.

دعت الحرب كل من الأطماع و النفوذ و الكراهية الى جوارها. كما دعا السلام كل من الإنسانية والرخا والحياة الى جانبة.

وظلت القوة و السياسة فى مركز متوسط بينهم جميعاً.

بدأت النفوذ بالكلام وقالت : سيدتنا الحرب قررت أن تعقد هدنة مع السلام، لكننا نرى
فى هذه الهدنة تقليل من شأننا لكن فى النهاية هى السيدة التى يجب ان يطاع أمرها.

القوة : يجب ان تحافظ كل الأطراف على هدوئها بأنفسها وإلا سأتدخل.

السلام: لا داعى لك الآن فنحن فى جلسه للهدنه .

الحرب : حسناً يا أيها السلام ماذا تريد من هذه الهدنه.

السلام : أريد ان نتوقف قليلا لتضميد جرحانا وتعمير ما دمرتيه.

الأطماع : وما حاجاتنا الى هذه الهدنة.

الإنسانية : حاجتكم انى إصيبت بالهون ويجب أن لا أموت وإلا ستفقدون كل ما أنتم عليه.

الكراهية : وما حاجتنا إليكى، فأنتى لست مطمع لأحد. من يهتم بكى أنتى.

الحياة : كلنا فى حاجه إليها، فالإنسانية هى مصدر وجودى.

الحرب : هذا الجدل لن يفى بغرض وجودنا الآن، ماذا ترى السياسة ؟

السياسة : كلكم لبعض، مصيركم من مصير بعض. لا داعى للخلافات.

السلام : ماذا تريدى يا حرب لكى تتوقفى عن أعمالك.

الحرب : أن ينضم القوة الى صفوفى.

السلام : ولكن القوة دائما بيننا ولا يمكن أن تأخذيه ليكون لك وحدك.

الحرب : إذن فلأستمر انا فى عملى وتستمروا أنتم فى عملكم.

السلام : انتى تطالبين بالمستحيل .

الحرب : حسناً، ما رأيك فى أن نأخذ نحن القوة وتأخذ أنت السياسة ؟

السلام : يجب أن نبقى القوة والسياسة بيننا، يجب أن تعلمى بأن فعلك هذا ستمدرين
نفسك ؟

الحرب : وما أدراك أن الدمار ليس من أعوانى؟ بل هو أخلص أتباعى ولا يمكن أن ينشق عنى

السياسة : دعونا نخير القوة بينكم وهو يذهب الى من يريد ؟

الحرب : فليكن هكذا، لكن هذا يستم بالقرعة لكى ننهى هذا الجدال ؟

السلام : حسنأ.

أناب الحرب والسلام السياسة ان تكون صاحبة القرعه، فكتبت ورقتين وأعطتها القوة. قبل ان يختار القوة ورقة بينهم ليتحدد مصيره الى أين سيذهب قالت الحرب، فالتعلم أنك معى ستكون أقوى ، وقال السلام إن كنت معى ستكون أكثر إفادة عندما تصبح أكثر حكمة فى تصرفاتك.

نظر القوة إليهم لا يعلم الى أين سيذهب، اختار ورقة ونظر فيها وقال، إذن لأكون أكثر قوة.

وأظهر الورقة الى الجميع فكانت الحرب.

شهق الرخاء فى آسى ودمعت الإنسانية.

قالت الحياة الى السياسة : إذن فأنتى معنا ضدهم
قالت السياسة : هكذا يبدوا

هام الجميع بالمغادرة وسط فرحه عارمه للحرب وأعوانها وخيبة أمل للسلام وأتباعه.

وسط خروج الجميع مالت السياسة نحو الحرب وقالت لها، فلتكن هى الحرب.

نظرت الحرب بإستغراب مع تباعد السياسة مع السلام وأتباعه ونظرت فى يدها لتجد الورقة الآخرى التى كتبتها السياسيه التى كان يختار بينهم القوة لتجد مكتوب عليها " الحرب ".

الثلاثاء، سبتمبر 26، 2006

تدوين ذكرياتى


إنهارده عيد ميلادى،وطالما انا عمرى ما احتفلت بيه بأى شكل كان. قررت أن السنة دى اعمل حاجه .
أدون أهم الذكريات فى حياتى.

* ذكرى اول يوم دراسة فى الصف الرابع الإبتدائى، بابا كان جايبلى الشنطة معاه وهوا جاى من السفر، كنت فرحان بيها قوى. وكان اول يوم دراسه فى الطريق من البيت لحد المدرسة كنت ماشى وانا فى قمة السعادة.


* ذكرى اول وآخر مرة اتعور فيها، كنت فى سنة خمسة إبتدائى وكنت بحوش بين اثنين بيتخانقو، وفجأة .... الحجر الطائر الحائر يستقر بالإرتطام بدماغى، والنتيجة ثلاث غرز.

*ذكرى اول يوم فى الصف السادس الإبتدائى – كنت أزهرى – اول مرة افكر فى نظرية البداية والنهاية، وإن كل حاجه طالما بدأت لازم تنتهى، وان زى ما اول يوم دراسة دخل يبقى آخر يوم قرب جدا، وان حياتى زى ما بدأت قربت نهايتها طالما بدأت فيها.

*ذكرى وفاة اول صديق ليا، كان عندى 10 سنين وفى الأجازة ورايح أجيب النتيجة ، وسألت على محمد رمضان لقيت الأستاذة اللى كان محمد ساكن جنبها بتعيط، وقالتلى انه مات, كان بيعلب وكان واقف بجانب جدار على حدود ارض فاضية واصدقائه كانو على الطرف التانى من الجدار. والجدار كان ضعيف والأولاد كانو ساندين عليه جامد فوقع الناحية الأخرى على صحبى ومات. ما سألتش على النتيجة وخرجت من المدرسة رايح عند بيت صحبى. لقيتهم ناس فى الشارع جالسين على كراسى ومشغلين قرآن والكل عليه ملامح حزن مكنتش معتاد إنى أشوفها.ما اقدرتش اطلع البيت عند صحبى ولا اعمل اى حاجه غير انى اقف عند الأرض الفاضية وأثر الهدم علشان يطلعوا صحبى عليه، ودم صحبى على الأرض بعد ما أتمزج بالرمال.

ساعتها قررت انى ما أحبش حد لدرجه انه لما يموت أنهار او أضعف، لإن فى النهاية كلنا هنوت ومحدش عارف امتى.

*ذكرى ميلاد شخصيتى ، 26/10/1994 اول يوم شغل ليا.

*ذكرى اول منصب إدارى أمسكه 1997.

*ذكرى اول مرة تبوظ منى حاجه فى شغلى 1998 .

* ذكرى خيانة اللى كنت فاكرهم اصدقائى، واللى تتبعه فهمى للمعنى الحقيقى لكلمة صداقة فى المستحيل الثانى ( الخل الوفى )

* ذكرى وفاة والدى اللى ما اقدرتش أخرج ولا دمعه من عينى، مع إنى بكيت من قلبى كتير قوى.

*ذكرى خاصة فى قلبى.

* ذكرى شغلى فى شرم الشيخ اللى عرفت منه حاجات كتير قوى ماكنتش هقدر اعرفها لو ما رحتش هناك.

*ذكرى اول مرة يعرض عليا وظيفة بمرتب خيالى وأرفضه.

*ذكرى اول مره يجيلى شغل بره مصر واديه لوحد صحبى.

*ذكرى زواج اختى وفرحها.

*ذكرى مولد اختى الصغيرة والسبوع بتاعها.

* ذكرى تعورية أخويا واحنا بنعلب كورة على السرير، فداس على الكورة فقد توازنه ونزل برأسه
على حرف السرير واتعور فى حاجبه الأيمن وأخذ غرزتين فيه.

*ذكرى حصولى على ميدالية القارئ المثالى .

*ذكرى اول مرة أشرب سجائر.

* ذكرى مدرس كيمياء مكنتش بفهم منه اى حاجه، ومرة فى الفصل نمت فى الحصة بتعاته، وكنت جالس فى الصف الثانى، المدرس وقف ورا واحد نايم فى آخر الصف وقاله: لو مش عجباك الحصة اطلع أقف بره . انا كنت نايم وافتكرت ان الكلام ليا رحت قايم لابس النظارة ومتجه الى الباب. ونظرت الى المدرس لقيته بيكلم واحد تانى، طبعا المدرس انهدش من انى واقف عند الباب، راح مزعق وقالى كمل على بره انا هعرفك شغلك بعد الدرس ما ينتهى.

طبعاً خرجت وانا مش عارف اعمل أى حاجه، مدير المدرسة راجل بيحب الطلبه لدرجه اللى ما يردش السلام بطريقه تعجبه ممكن يقعده فى بيتهم سنتين تلاته هوا ومزاجه. طبعاً انا كنت
بموت فى جلدى نص ساعه عدت عليا كأنها ثوانى وانتهى الدرس وصمم المدرس إنه يأخذنى الى المدير اللى كان واقف فى فناء المدرسة.

الطلبة كلها خرجت تتفرج عليا وانا متعلق فى أيد المدرس زى كيس الفاكهة ونازل قدامه على السلم فى إتجاه المدير.

لقينا المدير واقف مع أحد المشرفين من الوزارة، راح مدرس الكيمياء الله يكرمه استغل الموضوع علشان يفصلنى نهائيا ويخلص، وبدأ المدير يسأل خير يا أستاذ انت ماسك الطالب ليه كده فيه آيه – لحسن الحظ ان المفتش موجود وإلا كان المدير كمل على كيس الفاكهة وعجنه قبل ما يعرف فى آيه - المدرس بدأ كأنه فى ساحة محكمة، الطالب دا دليل على الإستهتار والتسيب وعدم الإنظباط، وفضل يقول كلام بقت مش سامعه علشان بفكر هعمل آيه فى المصيبة دى، خلص المدرس المرافعه والمدير نظر إليا نظرة انت هتروح فى ستين داهيه، لكن المفتش واقف فلازم المدير يعمل فيها ديموقراطى ويدينى حق الدفاع، ولحد ما قالى آيه اللى حصل؟ كنت هموت من الخوف ان المدير يصدق على كلام المدرس ويصدر الفرمان بتاعه وساعتها هروح فى الكازوزه.
بدأت كلامى بسؤال : لو انا قولت حاجات غيراللى المدرس قالها حضرتك هستمعنى ولا لأ ؟ قالى أكيد هسمعك – ربنا يخلى كل المفتشين اللى فى الدنيا – فأول حاجه قولتها إن اللى عملته خطأ لا رجعة فى ذلك، وانى مش هاجادل فى خطأ انا عملته. انبسط المدير قوى لإنه
هيتلذذ فى تعذيبى، ورحت مكمل وشرحت ليه انا نمت فى الحصة، وقولت ان مشكلتى انى مش بفهم الكيمياء كويس ودى مشكلة كبيرة مقابلانى فى المدرسة، وعلشان ما أضيعش وقت الدرس فى إنى افضل أسأل وأضيع الفرصة على زملائى إنهم يفهموا، قررت إنى اوضع رأسى على المنضدة وأسيب لزملائى فهم المادة العلمية الرائعه السلسه اللى بيشرح بيها الأستاذ الفاضل. وكررت إعتذارى للمدرس أمام المدير والمفتش. فجأة المدرس لقى نفسه فى دائرة حوار غير اللى كان بيتكلم فيها، ولسه هيفوق من الكلام اللى قولته رحت وجهت الكلام ليه، قولت له أنا متأسف يا أستاذ حضرتك هتقبل أسفى ؟ المدير والمفتش راحو باصو على المدرس منتظرين رده! المدرس لقة نفسه مجبر انه يقولى قبلت اعتذارك، رحت لاحق الإعتذار بإستفسار هل حضرتك هتسمح ليا احضر الحصص القادمة مع وعدى إنى مش هسأل حضرتك أبدا ولا هقاطع شرحك وأنى هبذل قصارى جهدى فى إنى أفهم حضرتك بدون إزعاج، راح
دايس على أسنانه وقالى مااااااااشى إححححححضر. رحت مستأذن المدرس والمدير والمفتش وخارج من المدرسة وانا فى قمة الشعور بالإنتصار اللى حققته، وفى إنى قدرت اضع يدى فى فم الأسد وأخرجها مع عدم قدرة الأسد إنه يعمل آى حاجه.

* ذكرى اول مرة اركب خيل، والحمد لله كانت آخر مرة.

*ذكرى أول صيام لشهر رمضان كامل وانا فى الصف الخامس الإبتدائى.

*ذكرى ذكرياتى الهائمة على ضفاف النيل فى وسط القاهرة، والبحر فى الإسكندرية.

*ذكرى اول مدونة اكتبها ( العلاقة بينى وبين أخى المسيحى ) لإن المدونة اللى قبلها ماكنتش من كتابتى لكنى كنت مؤمن بالفكرة اللى فيها.

ذكريات كتير
إتقالت وذكريات أكتر ربنا يسهل للسنة الجاية وأدونها، ويبقى إحتفالى بعيد ميلادى هو
تدوين ذكرياتى.

الجمعة، سبتمبر 15، 2006

الحضارة المفقودة

منذ بدأت البشر على الأرض فكروا فى فعل أشياء كثيرة وأهمها بناء حضارة.

من أقدم الحضارات على الأرض الحضارة الفرعونية، التعمق فى البحث فى اسباب قيام الحضارة الفرعونية نجد عامل أساسى فى قيامها وإستمرار تداول المنهج الى اكثر من 10 قرون متتاليه فى اعمال معينة. هذا العامل هو الضمير .

فطن ملوك الفراعنة الى شقى الضمير لدى الإنسان، ضمير لما يفعله الإنسان مع الإنسان، وما يفعله الإنسان مع الآلهة. قامت الحضارة الفرعونية عندما استطاع الفرعون توحد شقى الضمير، واصبح لدى المواطن العادى الإيمان بأن الملك هو من سيأخذ بيده ليعبر به الى الخلود. وبدأ الناس فى تنفيذ أوامر الفرعون ومراعاة ضميرهم فى تنفيذ أوامره وتوريث هذا الضمير الى أبنائة والى أحفاده.

قامت الحضارة الإسلامية أيضا الى أساس الضمير الإنسانى فى علاقته مع الناس وفى علاقته مع الله، وكانت أوامر الرسول صلى الله عليه وسلم فى إتقان العمل وليس مجرد إنجازة دليل على أهمية الضمير فى قيام الحضارة الإسلامية، وفى إنهاريها أيضا.

فعندما يغيب اى شق من شقى الضمير يتحول التقدم فى الحياة الى حلقة مفرغة لا هدف له. مجرد إزدهار نمط الحياة بدون هدف. نجد الغرب الآن فى تقدم عالى فى اساليب الحياة لإنه إستخدم شق الضمير الخاص بمعاملاته مع الناس، فهو يتقن تنفيذ عمله ولو بدون رقيب مباشر عليه، لإيمانه بأهمية إتقان العمل, لكن على المستوى الأخلاقى نجد غياب الضمير مع الله ادى الى ضياع قيمة الإنسان كإنسان، نسبة إنتحار عالية لفقدان هدف أسمى فى الحياة من المال، علاقات
إجتماعية غير مترابطة، نجد الترابط الإجتماعى لا يزيد عن فردين. ومفهوم العائلة مفهوم مؤقت وليس دائم. بالرغم من الحرية الجنسية - المسماه حرية فى نظرهم - أكبر نسبة إغتصاب فى العالم فى الولايات المتحدة، وخصوصا زنا المحارم. إن إختفاء عامل الضمير مع الله اوجد فى الغرب أشباه حياة. فالتعبير السائد عن اى مغترب انه مفتقد الحياه ، وهكذا تعبير من يأتى للسياحة فاول ملاحظة تعير إنتباهه أن هناك حياة.

عالمنا العربى الكبييييييييير، فقد الضمير بشقيه منذ زمن طويل والنتيجة، ضياع أجيال فى النهم على اللاشئ، فلا هو قادرعلى ان يجد نفسه فى العمل او فى ان يتجه اللى الله الإتجاه الأمثل المعتدل.إبتداء من عامل النظافة المفتقد للضمير
ولا يعمل اللا فى وجود رئيسه المباشر وإذا ادار ظهره توقف عن العمل ، الى رئيس دولة باع شعبه. فماذا ننتظر من أمه بلا ضمير ؟

اعتقد الحل ليس فى تغيير قمة الهرم، بل تغيير قاعدة الهرم الأولى. أن نبدأ أنت وأنا فى التتغير، ان يصبح لنا ضمير.


الجمعة، سبتمبر 08، 2006

جندى قتله قائده

التاريخ/ يوم أحداثه مثل أحداث الغد، مثل أحداث الأمس
المكان/ العراق
الزمان / وقت ليس للعراقين فيه مكان على أرضهم
المهمة / دورية مراقبة
كود الفرقة / حماة الحرية
الحدث ....................................................
جون : متى موعد أجازتك يا دافيد ؟
دافيد : الأسبوع المقبل، وستكون لمده شهرين متتاليين، أليس هذا رائع ؟!
جون : أجل، فأنت لم تذهب الى الولايات المتحدة منذ عام ونصف تقريباً.
دافيد : بل هو عام وستة أشهر وثلاثة أسابيع ويومان وثلاثة عشر ساعه.
جون : يا إلاهى، انت تعد الأيام والساعات ؟
دافيد : وبكل أسف أعد أيضا عدد زملائى الذى قتلو فى الحرب، فهم حتى الآن ستة عشر من اصدقائى فى الوحدة .
جون : هؤلاء الأوغاد العراقيين، يقتلوننا ونحن نحميهم.
دافيد ينظر الى جون بإستغراب ويسأله فى لهجة غربية ..
دافيد : هل تعتقد حقاً اننا نحمى العراقيين ؟ وممن من نحميهم ؟ أنحميهم من أنفسهم ؟!
جون : نعم فهم همجيون لا يعرفون مصلحتهم، ونحن نعلمهم الديموقراطية، كما سنعلمها للعالم أجمع.
دافيد : من تقصد بكلمة نحن يا جون ؟
جون : نحن الأمريكيين.
دافيد : لكنى لا أريد ان أعلم أحد كيف يعيش، فهذه حريته يعيش كيف ما شاء.
جون : ولكن طريقه عيشه تعرض حياتنا للخطر. ألم ترى ما حدث لنا فى نيويورك؟ ألم ترى كم من الضحايا والأبرياء سقطوا. ألم ترى الإرهاب بأبشع صوره يمارس على أرضنا. فما ذنب هؤلاء المدنين الأبرياء الذين كانوا فى برجى التجارة لكى يموتوا بهذه الطريقة.
دافيد : وما ذنب كل من ماتوا من المدنيين فى حربنا على العراق ؟
جون : شجرة الحرية تروى بدماء الأبرياء لكى تقوى.
دافيد : وما أدراك ان دماء من ماتو فى برجى التجارة لم تكن تروى شجرة حرية لدى آخرين ؟
جون : ماذا تقصد ؟
دافيد : أقصد انه لماذا ألمنا من ماتوا فى برجى التجارة، ولم يؤلمنا من ماتوا فى العراق ؟
جون : بالطبع ألمنا هذا أيضاً. ونحن هنا لكى نضمن أن لا يسقط ضحايا آخرين ليس لهم ذنب .
دافيد ينظر الى جون بتهكم واضح
دافيد : وهل فعلا توفقت دماء الأبرياء ؟
جون : بالطبع فلم تمدت يد الإرهاب على أراضينا منذ تلك اللحظة. فالكل يعلم ماذا سيحدث له لو ظن أن دماء الأمركيين تسفك بلا حساب
دافيد : ولكن دماء العراقيين لا ثمن لها، أليس كذلك ؟
جون : دافيدن ماذا حل بك ؟ لماذا تدافع عنهم بهذه الطريقة؟ أليس هم من قتلو زملائك ؟ أليس هم من يصنعون أسحلة لدمار شعبنا وبلدنا؟ أليس هم من قاموا بجرائم ضد الإنسانية ؟ هم إرهابييييييييييييييين
دافيد ينهض ويصرخ فى وجه جون
دافيد : ليسوا هم من فعل كل هذا، هل لديك دليل على ما تقول ؟ لقد صنفت اعمالهم على إنها إرهاب بماذا تسمى أعمالنا فى العراق ؟ سلام !!
جون : نعم فرؤسائنا أخبرونا أنه .........
دافيد : اللعنة على رؤسائنا هم لا يعلمون أيضا لماذا نحن هنا، ومتى سينتهى كل هذا.
جون : دافيد ماذا تريد أن تقول ؟ هذه إتهامات خطيرة !!!
دافيد : لا أريد أن أكون جزء من حرب لا أدرى لماذا قامت ؟ والى متى ستستمر ؟ عندما ترى جنوداً أجانب فى بيتك هل سترحب بهم ام تقاتلهم ؟ لا أدرى إن كنت مغتصب أرض أم حاميها ؟ انا لا أدرى ماذا سيقول عنا التاريخ بعد مرر الزمن؟ لا أريد أن أكون جزء من تاريخ قد يندم أحفادى على أنى كنت مشارك فيه فى يوم من الأيام.
جون : دافيد انت مضطرب الأعصاب، إهداء حتى يتسنى لنا التفكير بشكل سليم
دافيد : أنا لا أريد أن أهدئ، ولا أريد أن أفكر، ولا أريد أن أكون جزء من هذه التفرقة. هم بشر ونحن كذلك، قتلاهم من الأبرياء وقتلانا أيضا فى برجى التجارة من الأبرياء. لا أريد ان يراق دماء أخرى من الأبرياء بلا ذنب، بلا هدف، بلا مقابل. اللعنه عليك يا جون، اللعنة على الجيش كله.
يبدأ دافيد فى نزع سلاحه وملابسه العسكرية ويجرى بجانب الطريق وييصيح مخاطباً العراقيين: انا لست عدواً لكم ،انا لست منهم . حلت الدهشة على من معه فى الفرقه وظلوا ينادوا عليه حتى يهدأ.
يضغط دافيد على لغم أرضى فينفجر اللغم فيه ويطيح به عدة أمتار، ويهرول إليه زملائه.
ينظر الى جون وباقى زملائه ويقول لهم والدماء تأتى من كل أجزاء جسده.
هل رأيت يا جون ؟ هل رأيتم جميعاً ؟! هم يعلمون أننا لسنا هنا لحمايتهم، بل لآخذ أرضهم. هم يعتبروننا أعداء, ونحن كذلك.

الجمعة، سبتمبر 01، 2006

شربت حشيش يا سعاد *

كل الناس لازم تدور على حاجه لما تعملها تتبسط، فى طريقة سهلة إنك تخرج فى مكان معين ، تقعد مع حد بتحبه، تقرأ ، او طريقة أسهل المكيفات.

كله بيدور انه يعمل دماغ ازى ويبقى فى حالة ذهنيه معينة، سواء لهدف معين او للعيش فى اللاهدف فى اللاوعى، ودا هدف فى حد ذاته مع بعض الناس.

انا بوصل للحاله دى لو قعدت قدام البحر لمدة تزيد عن نص ساعه لوحدى، بنسى الناس واللى حواليا وكل حاجه، وآلاقى نفسى بفكر فى حاجه واحده بتركيز عالى، وأى حاجه تانيه مجرد سراب، واول ما اقوم الاقى نفسى مش متزن وممكن افقد التركيز مع اللى حواليا لمده دقيقة، وساعتها اشرب مياه كتير او احط راسى تحت المياه علشان ارجع طبيعى مع الناس.

99.9% من اللى اعرفهم ليهم فى المكيفات،مش عارف ليه! بإختلاف إمكانتيهم المادية والفكرية والعقائدية بطريقة كيفهم، منهم الغلبان زى حالاتى ودول قليلين الباقى مصنف ،اللى ليه فى الحشيش وطائفته، واللى ليه فى الخمور وطائفتها، واللى ليه فى المواد الكيميائية وطائفتها، كل واحد ودماغه واللى يقدر عليه.

دائما الاجابة البديهية من اى حد منهم اسأله انت ليه بتتعاطى مكيفات لازم تكون الاجابة علشان اعيش فى لحظة معينة مش هعرف اوصل لها وانا فايق، بمعنى مثلا وحد صحبى لو متخانق مع مراته ونزل من البيت لازم يشرب حشيش قبل ما يرجع وإللا هيرتكب جناية، فالحشيش بالنسبة له مهدئ اعصاب قوى وبيخليه فى حالة تسمح بالنقاش الى ابعد حد. فبغض النظر إن كان دا طبيعى ولا لأ بس دا سبب كافى بالنسبه له انه يتعاطى مكيف ما .

واحد تانى لما يكون عنده اجتماع فى الشركه، ولازم يدخل بمقترحات جديدة ،لازم يشرب كاسين ويدخل يقول أحلى كلام فى الاجتماع، ويطلع بخطط عبقرية فى الشغل، وهو نفسه مش قادر على إيجاد علاقة بين الخمر وان دماغه تشتغل بس هوا اخد على كده، وبقى بالنسبة له دا سبب كافى لمكيفات.

وهكذا لقيت ان الحالة اللى هما بيكونوا فيها انا كمان بكون فيها بتأثير البحر عليا،
لكن هما يقدرو يستحضروا الحالة دى فى اى وقت وفى اى مكان.

قررت اجرب المكيفات واجرب هل فعلا هوصل للحالة اللى بكون فيها على البحر؟ وآيه اللى هيتأثر فيها علشان اوصل للحاله دى ؟
رحت عند واحد صحبى* دماغه عليا قوى فى التفكير وفى الكيف فى نفس الوقت.
هوا عارف انى مش بشرب، ولو هوا هيشرب قدامى لازم يكون مجال الدخان بعيد عنى وإللا هقوم واقعد فى مكان تانى لحد ما يخلص، المهم قولت له انا عايز اشرب حشيش، قالى اوك، ولا سألنى ليه ولا قالى اى تعليق لف السجارة بإحتراف كالعادة وإدهانى.

قبل ما امسك السجارة منه عرفت انه طالما انا قررت يبقى مافيش تراجع ولازم اثبت اللى عايز اثبته مهما كانت النتائج. طالما انا عارف إنها مش لتجربة الحشيش كمكيف بل لمقارنة التأثير الطبيعى للمخ والتأثر الخارجى لنفس الهدف.

وأخذت السجارة وبدأت فى شربها عادى كأنها سجائر عادية، صحبى قالى لما توصل قولى وهات السجارة، قولت له اوصل فين ؟ قالى هتعرف .
خلصت السجارة كلها تقريباً ومافيش اى تأثيير.

مددت على الكرسى وأخذت نفس عميق، لقيت ضربات قلبى بطئية! فبدأت اعمل فى دماغى زى مفكرة لتدوين التغيرات اللى بتحصلى، ونتائج تأثيرها.
اول ما لقيت ضغطى بيلخبط عرفت ان وظائف المخ مش هتشتغل بالشكل الصح، لإنى لما كان بيحصلى هبوط بسبب قلة النوم وكثرة السجائر والشاى والقهوة، كان تركيزى بيقل جدا وبيبقى مركز على حاجه واحدة وكانت فى الغالب شغلى وبس، وتتحول كل حاجه حواليا الى مجرد معطيات فى شغلى لحد ما أنام.

لقيت نفس التأثير فى البدايه من الحشيش، بدأت انا وصحبى نتناقش فى اى موضوع كعادتنا. كنا بنتكلم عن الشيعة والسنه وبدايتهم وإتجاتهم الفكرية وهكذا، لقيت نفسى عندى فقدان فى الذاكرة المؤقته بشكل كبير، مش قادر افتكر اول الكلام اللى كنا بنقوله، او النقاط الرئيسية فى الحوار، ولو حاولت اركز فى التفكير فى انى اجيب اول الكلام الاقى الفترة الزمنية اللى اخذتها ضيعت اللى صحبى قاله فيها.

فبقت كارثة ، مش قادر اركز فى حاجتين فى نفس الوقت، وعندى قدرة غريبة فى الشعور بالتفاصيل اللى حاوليا، لكن لو ركزت فيها باقى الحاجات تختفى من الذاكرة.

قررت نخرج انا وصحبى من الغرفه ونطلع فى البلكونة، وهوا ساكن فى آخر دور فى برج، فالحياة بقت بمبى خالص، والهوا راح لاطشنى، والدماغ عليت على الآخر.

الطبيعى بتاعى انى أفكر فى اى حاجه قبل ما اعملها، سواء كانت حركة او كلام، اول ما طلعت البلكونة لقيت نفسى اللى عايز اعمله بيتعمل من غير ما افكر فيه، لقينى مثلا ساند على سور البلكونة وكأنى نايم على السور، وصحبى بيكلمنى رحت مديله ظهرى وباصص الناحية الاخرى كأنه مش موجود، ورجعت تانى ابص له، لقيت نفسى مش قادر افكر فى افعالى قبل ما اعملها، قولت لصاحبى تعالى نقعد احسن لحسن انا زهقت من الوقفه.
وبدأت انا وصحبى نتناقش فى كتاب خريف الغضب لمحمد حسنين هيكل، وبدأ صحبى - والله اعلم ان كان قاصد ولا لأ- بفتح موضوعات كثيرة بجانب الموضوع، ولقيت نفسى فى تفرعات كثيرة مش قادر اوجد الرابط بينهم،وكل شوية ألاقى رجلى بتلعب لوحدها، اروح باصص لها كأنها رجل واحد تانى، واللى زود الطين بله ان صحبى بدأ فى ذكر حقائق تاريخية غلط، وكل نقطة يقولها آلاقى نفسى رحت معاها واتحقق من صحتها وارجع له تانى، آلاقيه دخل فى موضوع تانى، يا نهار اسود بقيت حاسس ان دماغى هتنفجر من كتر محاولات الربط فى المواضيع. وفجأة لقيت صاحبى بيقولى انت بتناقشنى فى آيه انا بحكيلك التاريخ زى ما هوا، رآيى ورآيك مش هيغير من حاجه، وسألت نفسى سؤال مميت ، هوا انا ناقشته أصلاً؟
يا خبر منيل هوا انا دماغى راحت ولا آيه؟ وبدأت اركز فى الكلام اللى اتقال ، وكنت فاكر ان المفروض ان دلوقتى هوا بيتكلم عن مرحله معينة علشان يبقى الكلام مربوط ببعضه وفعلا لقيته بيتكلم عن العربية، عربيته والمشاكل اللى شافها وهوا رايح المصيف، قولت بس كده حلو قوى، شوية هرمى نفسى من البلكونة واعمل فيها حمامه وانا مش دارى واصحى على صوت واحد بيقولى رخصتك انت طاير من غير نمر ومش حاطط الحزام.

قولت لصاحبى انا عايز انام علشان عندى شغل الصبح بدرى، وانا على السرير جانى شعور هوا انا لو نمت وصحيت هفتكر كل التفاصيل دى ولا هنسى؟ ما انا مش عارف اللى انا فيه دا هيقع من الذاكرة زى كلام صحبى لا هيفضل؟ وأول ما بدأت اترمى تانى فى انى افكر فى الكلام اللى اتقال وانى احاول افتكرة لقيت دماغى هتسافر ومش هعرف هيا هتروح فين وهترجع امتى، رجعت فى اول تاكسى قولت انا هجرب حاجه، اختارت كتاب للحضارة الفرعونية من عند صحبى وفتحت الفهرس واخترت فصل دفن الموتى، وقرأت منه صفحة ورجعت الكتاب مكانه، وقولت لنفسى انا لو صحيت وافتكرت الكتاب وانهى فصل قرأته وقرأت لحد فين ابقى انا كده تمام وفاكر كل حاجه وهقدر افتكر كل التفاصيل، انما لو قمت من النوم عادى رحت طالع على شغلى يبقى 100 100 ويبقى مات الكلام على كده.

صحيت من النوم صدرى واجعنى موووت، وقمت على المكتبة وطلعت الكتاب والفصل وآخر فقرة وقفت عندها، قولت حلو قوى التجربة المنيلة اللى عملتها دى.

قعدت افكر فى ان فيه تشابه بين الحالة اللى بوصلها على البحر والحشيش فى وقت معين وهو وقت التركيز فى حاجه واحده والباقى سرااااااااب فى دماغى، لكن لما بقعد على البحر واعمل دماغ واقوم وافوق من الغيبوبه اللى كنت فيها وارجع مع الناس طبيعى بحس بإنتعاش غريب فى الذاكرة، الحشيش ما عملش دا معايا بالعكس فضل عندى إحساس فقدان الذاكرة المؤقته بشكل كبير. وفصل عندى القدرة فى التحكم بالإنفعلات السريعه عندى.
ييييييييه نسيت أقول حاجه - الله يحرق الحشيش على اللى بيشربوه- قبل ما انام إتكلمت مع صحبى فى التغيرات اللى حسيت بيها والنتائج اللى طلعت بيها فى ان الحشيش أثر على ضربات القلب فالمخ فنيخ ،وفى حاجه حصلت فى الذاكرة خليتها بتشتغل بطاقه غريبه وبتركيز عالى فى حاجات والباقى لأ.

إتعاوج فى القعدة بتاعته كأنه خبور محششانى قديم، وقالى اى مكيفات مش هتجيب حاجه من عندها هيا بتعمل عمل حاجات فى الجسم بيقوم بيها، لكن بشكل مختلف، تسرع حاجات فى المخ والجهاز العصبى ، تبطئ حاجات فى الذاكرة والاستجابة كله على حسب نوع الدماغ المطلوبه، وهكذا وفضل يقولى امثلة مش فاكرها، علشان كنت بفكر فى الكلام اللى قاله، وكالعادة الوقت اللى بسمع فيه صوت تفكيرى مش بسمع اى صوت من بره، ولو سمعته كأنه بياع خضار فى الشارع سامعه بس مش سامع هوا بيقول آيه، قولت له انت صح، عندك حق،
ورحت نايم من غير ما اقول ولا كلمه، كأن الكلام انتهى فجأة.

كشفت راسى ودعيت دعوة واليه ساعة مغربية ربنا يخلي اسكندرية، وبحرها اللى بيعملى دماغ محدش فى الدنيا يعرف يخلينى اعمل زيها ولو شربت المحيط كله.

واول ما قولتلها انا شربت حشيش يا سعاد، راحت لطمت ورقعت بالسوط ، وقالتلى الكيف مناوله مش مقاولة

==========================

* ( شربت حشيش يا سعاد ).. من فيلم كراكون فى الشارع ،لعادل إمام ويسرا
* مش عارف هل الاحداث دى هسجلها على إنها حدث حقيقى فى ذاكرتى، ولا هرفض وجودها وتبقى مجرد تدوينه ليس لها اى اصل فى الحقيقة.

* اخص بالشكر ابو فرح على المعلومات والواجب اللى عمله معايا فى التدوينه دى.

الجمعة، أغسطس 25، 2006

مبدأ


فى ناس أصحاب مبادئ ، وناس معجونة بمبادئ
صاحب المبدأ هوا اللى جرب الصح والغلط واختار ياخد الصح او الغلط او حاجه فى النص المهم انه اختار
المعجون بمبدأ هوا اللى بيعمل الصح او الغلط من غير ما يعرف ليه هو مش بيعمل عكس دا وبتبقى طبيعته ان بيعمل دا وخلاص
معجونة فينا حاجات كتير منها صح ومنها غلط ومنها ولا هو صح ولا هو غلط حاجه تخنق
اتعجنا ان الاحترام انك ما تحطش رجل على رجل قدام حد اكبر منك او ابوك ولو بتشرب سجائر عيب تشرب سجائر قدامه، طب ليه ؟ ماتسألش هوا كده وخلاص
اتعجنا بحاجات كتير فى الدين ما نقدرش نسأل عنها ولو فكرت تسأل حد هتلاقيه هب فى وشك كأنك شيطان رجيم، حد يقدر ينقاش سبب نزول حديث فى البخارى تبقى كارثة وكأن صحيح البخارى او صحيح مسلم قرآن لازم مانفكرش فيه هوا كده وخلاص
اتعجنا ان نجاح اى شخص مرتبط بتكوين عائلة وانه يتزوج ويخلف ويفضل يربى اولاده لحد ما يكبروا ويتجوزوا ويخلفوا ويفضلوا تحت رعايته لحد ما يموت والابن يكمل نفس المشوار مع اولاده وهكذا وكأننا فى ساقية، حلقة مفرغه مالهاش نهاية واللى يحاول يخرج بره الدائرة تتقلب الدنيا عليه ولما يكبر كل الناس تمجد فيه وان هوا دا مثل الحياة الصح بس محدش يعمل زيه
البنات فى المجتمعات الشرقية إتعجنت لما شبعت عجن فى حاجات كتير انا كشاب بتخنق لهم فما بالك بيهم، اتعجنوا ان عيب يتعارض رآيها مع رأى ابوها او جوزها او اخوها ولو حصل كلامه هوا اللى يمشى وكأنها طفلة الحشرة وحسالة المجتمع ومالهاش لزمه
نفسى ابطل اتعجن بمبادئ وابقى صاحب مبدأ على طول
*شواذ القاعدة هما اللى بيثبتوا إنها صح *

الجمعة، أغسطس 18، 2006

عكس التيار


واحد صحبى بيحب يتفرج على الافلام جدا ويبقى مستمتع بالقصة والخيال والحركات اللى فى الفيلم، مجال شغله عرفه على حد فى السينما ودخل لعالم التصوير السينمائى وبعد شوية من دخوله لعالم السينما وأنه يشوف كواليس الأفلام وطريقة تصويرها اصبح مش بيستمتع بالقصة بل بالعكس بقى بيشوف كيفية التصوير والاخراج والمتثيل فى الفيلم وفقد متعة القصة فى الفيلم تماما، اصبح مش بيتفرج على الافلام زى الأول لإنه للأسف بقى بيفهم
واحد تانى اعرفه خطط لحياته انها تكون فى السياسة وانه ياخد المجال دا لأخره، إنضم لحزب وبدأ فى التفاعل مع الأنشطة وفعاليات الحزب لحد ما مسك مشروعات صغيرة وبعدين اصبح نائب فى منصب مش عارف آيه وبعدين بقى امين الشباب عن مش عارف آيه المهم وصل لدرجه عالية فى الحزب وفجأة ترك كل دا وفتح شركة وترك العمل السياسى تماما ولما سألته قالى عرفت هما بيعملو آيه وليه وقررت لا اكون جزء فيه ، شوفت نظرة أسى فى عينه وعرفت أنه للأسف بقى بيفهم
واحد صحبى تانى قالى فى مرة ان الفراعنة منذ قديم الازل صنفوا البشر على ان منهم ما يستعمل يده فى حل اى مشكلة وان القوة هو مفتاح الحل دائما فى اى مشكلة تقابلها ، ومنهم ما يؤمن فى ان العقل ممكن يحل اى مشكلة تقف قدامه وان احساسه بيدة كإحساس الطائر بجناحيه
اعتقد ان الفراعنة انتهوا من على الارض لإنهم للأسف فهموا
الكارثة بقى فى واحد اعرفه معاه دكتوراه فى علم النفس ما بتكلمش اللا كل فين وفين مع حد ولما سألته انت مش بتتكلم ليه قالى واتكلم مع مين ؟ وليه ؟ محدش فاهم حاجه الناس بقت عايشه علشان تاكل وتشرب هوجع دماغى ليه معاهم انا كده مستريح
مشكلة كبيرة جدا انك تفهم، تخيل انك بتفهم اكتر من مديرك هتلاقى حياتك اتحولت الى جحيم لإنك بتفهم. حاول تكلم اهلك فى منطقك فى الحياة وانك فهمت اسلوب الحياة دلوقتى آيه هتلاقى كمية كلمات متقاطعة بتتحدف عليك بسبب انك بتقول انك فاهم
لما تبقى قاعد مع زملائك فى العمل او فى الكلية او على القهوة وتتخنق من نفسك من هول هيافتهم وتفاهة تفكيرهم وتفكر هوا ليه انا مش بفكر زيهم؟ ليه انا فاهم؟ كان فيها آيه لو بقيت واحد منهم بيقول اى كلام وخلاص، ويصبح فهمك اقرب الى النقمة من انه نعمة
فيها آيه لما تبقى عايش مش فاهم حاجه بتاكل وبتشرب وتنام وتشتغل وخلاص امبارح زى بكرة زى انهاردة كله محصل بعضه، تتكلم فى الكورة شوية وعن الاسعار شوية وعن اى كلام شوية واليوم بيعدى وخلاص، زى الفل.
مشكلة كبيرة انك تكون بتفهم، سهل انك لما ماتعرفش تعرف، لكن لوعرفت مستحيل تعمل نفسك مش عارف وما ينفعش ترجع ، ماينفعش تغمض عينك وتقول ما ليش دعوه ، ماينفعش تقول وانا مالى مايتحرقوا بجاز، خلاص اتكتب عليك تفضل ماشى عكس التيار صحيح بتلاقى مقاومة كبيرة ومحدش سامع اللى انت بتقوله، لكن دورانك ورجوعك يعنى تلغى دماغك ودا مستحيل، فالحل الوحيد طالما انت بتفهم تفضل ماشى عكس التيار

الأحد، يوليو 30، 2006

العرب ، الموتى الأحياء

















هذه ليست صور للمقابر الجماعية فى لبنان
بل هى مقبرة جماعية لنا نحن العرب فبصمتنا اصبحنا الموتى الأحياء

كلنا لبنان



الجمعة، يونيو 30، 2006

( العقل والقلب ( انت وانت


كم مرة سمعت انك تتكلم من العقل وليس من القلب ! انك لابد انت تستشير قلبك قبل ان تفعل كذا او كذا ! أن الزواج قرار من القلب والعقل معاً !!! ان تصف شخص ان لا قلب له او ان قلبه مات ! قد لا تنتهى الامثلة لكن هل هناك فعلاً عقل وقلب لهما رأى ويتحكمون فى تصرفاتك
كثيرا ما تحدثك نفسك عن شئ ما ، احيانا تتكلم الكلام قبل ان تقوله وتجد شئ بداخلك يخبرك ان هذا الكلام غير لائق ويجب تحذف كذا وكذا او ان تضيف عليه
كم مرة فعلت شئ لم يفهمه الناس لماذا فعلت هذا الشئ وتجد صوت بداخلك يخبرك انك على صواب وانهم على خطأ لكن ما هذا الصوت ؟ ولمن
كم مرة بكيت دون دموع، دون صوت ، بكيت وانت تضحك امام من حولك ؟ قد يراودك شعور انك غريب عن نفسك ، وانك لا تعرفها وتكلمها كأنك شخص بداخلك شخص آخر
كم تشتاق الى شخصيتك فى الماضى وكم كنت نقي وطاهر وبرئ . كنت تخاف من فقدان لعبة. كنت تضحك من قلبك ، كانت دموعك تتساقط امام كل الناس ، كان الحلم لا يعرف الكابوس وكان النور لا ظلام بعده ، كان العيد يأتى ببهجه لا توصف ، كانت ثقتك لكل الناس بلا حدود ، كانت الصداقة رابط اقوى من أشد الحبال ، كان الحب شمس لا تعرف المغيب ، كانت الحياة حياة وكنت أنت أنت وفجأة
لا تعرف هل ذهبت انت الى هذه الحياة ام هى اتت إليك ام فرضت عليك تعاليمها
اصبح الخوف سائد حتى من شروق شمس يوم جديد لا تعلم ماذا سيحدث فيه ، اصبحت الضحكات تأتى مجاملة وصفراء من غير طعم ولا احساس من القلب ، اصبحت الدموع ضعف ومن يراك ضعيفا قد لا يرحم ، نسيت معنى الاحلام لظهور الكابوس فى الحقيقة ، انحدر النور الى صفحات كتاب لا يقوى ان يقرأه احد ، اختفت بهجة العيد واصبحت ذكريات تأتى من بعيد ، ثقتك فى الناس قد تجعلك الان تعد اصابع يدك بعد السلام عليهم ، اصبحت حياة المصالح مع الاصدقاء حولتهم الى اشلاء اناس بالنسبة لك ، اصبح الحب كلمة لا يستطيع القلب إيجاد معنى لها ، أصبحت الحياة اشبه بالممات وأنت أصبحت إنسان آخر داخله إنسان عاش لكنه لم يستطيع الصمود امام تلك الحياة فقررت ان تصنع لك حياة أخرى حياة تستطيع فيها ان تكون اقوى مما يظنه الناس ، ومع كل خطوة فى هذه الحياة بتلك الشخصية ترجع حقيقتك الى الخفاء عشر خطوات ، هناك من ماتت حقيقته ، هناك من تظل به لكنها تحيى حياة حبيسه فى قفص من زجاج يرى منه ما تستطيع فعله لكنه لا يقدر ان يعدل فيه .
هكذا كان القلب هو ما يحيى بداخلنا من انسان نسيت او تناسيت تواجده بداخلك ، واصبح العقل هوا ما بنيته بنفسك لنفسك بكل ما يحمل من عادات وتعاليم وتصرفات قد لا ترضى عنها لكنك لا تستطيع إيقافها ، تدمع انت بداخلك وانت ترى نفسك تفعل ما لا ترضى ولكنك غير قادر على تغيره ، قد تسمح ان تسمع كلامك وقد تقتل بيدك أغلى ما تملك ، أنت

الجمعة، يونيو 23، 2006

لو سألتك انت مصرى تقولى إيه ؟

بدل ما تبدأ تقولى على رأى الست نانسى وتقلى مصرى وابن مصرى اسأل السؤال الصح يعنى آيه مصر أصلاً ؟

ناس كتير جدا سألتهم السؤال ده وطلعت بنتيجه غريبة جدا ، مافيش اثنين طلعوا بنفس التعريف

. لما تلاقى واحد بيحب مصر جدا جدا ولو اى حد قال كلمة وحشة فى حقها ممكن يقطعه ويسافر يشتغل بره ويرجع بعد سنه ولا اتنين تلاقيه مش طايق البلد ولا اللى فيها ويبقى هوا اول واحد مش عجباه ، يبقى لازم اعرف اصلا هوا يعنى آيه مصر ؟

ناس كتير ماردوش عليا اصلا واللى قال كلام قبيح واللى قالى مصر آيه اللى انت جاى تقول عليه انت عارف قبلا معنى البطاله آيه

. صحيح هى مصر يعنى آيه ؟

واحد قالى مصر فرعونية قولت هايل بس انت مش فرعونى قالى اه بس مصر فرعونية قولت له يعنى انت مصرى بس مش من مصر فى نفس الوقت

. تانح وغير الموضوع .واحد ألذ منه قالى مصر دى زى طبق السلطه ما تعرف لهاش حاجه فرعونى على رومانى على قبطى على مسيحى على اسلامى واحنا بقى اللى جوا الطبق ما تعرفش تقول على نفسك طماطم ولا خس إنك فى الآخر سلطه .وجهة نظر برضه بس مش كفاية ، لما حد اجنبى يسألنى جنسيتك آيه واقوله مصرى وانا مش عرف يعنى آيه شكلها وحش قوى قدام نفسك ؟؟؟

واحد قالى تعرف زمان كان الناس فى مصر كانوا عارفين آيه هيا مصر وكانوا ممكن يضحوا بأى حاجه للمعنى دا بس دلوقتى محدش عارف بقى الواحد ملخوم فى الشغل والبيت مابقاش فى وقت تتكلم عن حاجه او تفكر فى حاجه ومعظم الشباب من الفضى بقوا ما بيفكروش فى مستقبلهم مش يفكر فى مصر

!كلام كبير بس ما قاليش برضه اللى عايز اعرفه البلد دى معناها آيه ؟ واحد قالى لما البلد كانت بتحارب او فيها احتلال فكانت مصر هيا الجزء اللى ضايع او اللى موجود فيها الاحتلال فكل الناس عارفه ان مصر يعنى انك ترجع اللى راح منك بأى ثمن فتلاقى الناس عارفه يعنى آيه مصر انما دلوقتى خلاص كله فى البطاطا . قولت له يعنى علشان اعرف مصر يعنى آيه اروح اجيب ناس تحتلها فأعرف ؟ قالى كلمة ما ينفعش تتقال .

المهم برضه لما آجى اعمل اى حاجه على النت واكتب فيها استمارة بكتب البلد مصر وانا مش عارف ليه ولا يعنى آيه ؟

واحد جامد بقى قالى شوف اللى حصل فى كاس الامم الناس قبل الموضوع دا ما كنتش عارفه برضه يعنى آيه مصر ولما لقت حاجه بتمثل المعنى دا ولو فى كورة بقى الماتش اللى بيتعلب هى دى مصر وتلاقى الناس شايله علم مصر بعد ما كانت بتعمله قماشه فى المطبخ دا لو عند حد اصلا، وتلاقى الناس بقت ماشية فى الشارع تلاقى اعلام فى كل حته على العربيات وفى البلكونات حتى بتاع التين ماشى بعربية كارو عليها علم مصر ، لإن الناس دى لقت معنى للبلد لقت معنى لمصر صحيح هوا ماستفدش حاجه شخصية من ان المنتخب يكسب او يخسر بس دى مصر لازم تروح وتشجع وتشترى التذكرة بضرب الشبشب وزحمة وتقعد على القهوة شايل علم مصر وترسمه على وشك وتهلل وتقعد تقول مصر مصر

.

كلام جامد بس مش عارف كفاية ولا لأ يعنى مصر طلعت كورة فى الاخر ولا حرب ولا احتلال ولا سلطه مش عارف

.

واحد بدأ الكلام عن مصر انها من الشمال البحر الابيض والجنوب والشرق والغرب واشتغل فى نظام الجغرافيا بتاع ابتدائى وقالى مصر فيها

72 مليون شخص قولت له حلو جدا انت شوفت فيهم كام واحد ؟ قالى كتير قولت له يعنى 50 مليون قالى لأ طبعا اقل بكتير قولت له 10 الاف او 100 الف قالى تقريبا قولت له يبقى مصر فيها 72 مليون منين انت شفتهم بنفسك ؟ طيب مصر فيها 72 مليون دول عارفين مصر يعنى آيه ؟ كام واحد فيهم حافظ النشيد الوطنى ؟ دى كانت حاجه تكسف فى الماتشتات اللعيبة مش حافظة النشيد وتلاقى بقهم بيلعب بأى كلام مالوش دعوة بالنشيد الوطنى ولا بأغنية لام كلثوم حتى .

فلو سألتك انت مصرى تقولى

........................

الجمعة، يونيو 09، 2006

مبروك كسبت المليون

الف الف مبروك لقد ربحت المليون نقداً بعض خصم الضرائب وكل المستحقات المعلومة والغير معلومة ، من الآخر مليون صافى
مش مهم منين بقى ، دخلت مسابقة من سيبرح المليون ، طلعولك فى الشيبسى ، جمعت علب سمنة ، مش دى القضية انت كسبت مليون. أول حاجه هتعملها بكرة الصبح انك تروح تصرفهم من البنك وتمسك فى إيديك مليون من الآخر خلاص عديت الفقر ...
بس بكرة لسه كتير عليه حوالى 8 ساعات مش عارف تنام ولا تصحى ولا تجرى فى الشارع ولا تعمل آيه دول مليون ، طبعاً فى الف صاحب افتكر انك صاحبه وانك حبيبه من زمان وان اللى حصل زمان دا لعب عيال وان الظروف بعدتكم شوية وان البنت اللى كنت بتحبها وسابتك علشان ظروفك وحشة مقطعه نفسها مكالمات عايزه تطمئن عليك وعلى " مستقبلكم " مع بعض ...
دماغك صدعت من كتر الناس قررت تروح فى مكان محدش يعرفه وتقعد كده تشوف بقى حتعمل آيه بالمليون ..
لقيت احسن مكان محدش هيعرف يوصله وانت بتستريح فيه جدا جدا وقعدت حواليك كل مطلبات انك تقضى الساعات الباقية لحد البنك ما يفتح وانت مش ناقصك آى حاجه .
قعد وفردت ظهرك وطرئعت صوابعك ورحت باصص للسما تفكر آيه اول حاجه هتعملها بعد ما تخرج من البنك الصبح .. وهتعمل آيه بالفلوس آصلاً دا مبلغ مش قليل يعنى لازم تفكر كويس لازم تصلح حاجات كتير ماعرفتش تصلحها ، لازم تعمل حاجات كتير ماقدرتش تعملها ، فى أماكن كتير جدا كان نفسك تروحها ، فى حاجات كتير نفسك تشتريها ، فى مشروعات جامدة جدا كنت بتحلم بيها لازم تحققها ، فى متع كتير اتحرمت منها لازم تتمتع بيها .................. دماغك غليت من كتير التفكير يدك راحت على المنكر وبدأت تشرب علشان تعرف تفكر
( المنكر من العرق سوس لحد العناب )
مفعول المنكر بدأ وبدأت دماغك تهدى شوية لحسن الموضوع كبير دى فلوس كتير والفرصة مش بتيجى اللا مرة واحدة وانت لازم تستغل الفرصة انت مش مغفل .
أول حاجه تفكر فيها انك تظبط نفسك شوية لازم برضة يبان عليك الفلوس واللا الناس هتقول عليك محدث نعمة فلازم عربية كويسة يعنى لا تقل عن 100الف حاجه كدة لزوم الروشنة ولازم طبعاً تشوف شقة تعيش فيها انت واهلك بدل الشقة اللى انت فيها ولا عايزالناس تقول عليك انك ناكر جميل اهلك ونسيتهم فشقة كدة متواضعة فى منطقة راقية وشوية ديكورات فى حدود 150 ألف كويس جدا وبحد اقصى 200 الف واللا الناس هتقول عليك سفيه وتصرف فى أى كلام . صحيح نسيت انك تنزل تجيب ملابس جديدة لك ولأسرتك تليق بالمستوى الجديد علشان يبقى الموضوع ماشى كويس يعنى مش كتير حوالى 5 آلاف مش مشكلة دول مليون لسه كتير .
وعلشان ربنا يبارك فى الفلوس هتبنى مستشفى او وحده صحية تعالج بتكاليف قليلة لغير القادرين وهيبقى اسمك عملت خير برضه واللا الناس هتقول عليك انك جاحد وتبص لك فى القرشين اللى كتبهملك ربنا يعنى حسبة 300 ألف للمبانى والمعدات حلو قوى وربنا يبارك فى الباقى .
لازم بقى تشوف نقسك مش كل حاجه الناس الناس هما كانو عملوا لك آيه من الاول بس مش مشكلة خليك انت الكبير برضه .
لازم تعمل مشروع او استثمار يريحك انت برضه لازم تستمتع بحياتك لازمة الفلوس آيه اللا ان الواحد يستمتع بيها فاحسن حاجه تعلب فى البورصة تظبط كده أسهم فى شركة جامدة تعوض اللى راح فى البداية وتفتح مشروع جامد وتبقى انت المدير وتجيب كل اللى كانو بيتحكمو فيك قبل كدة وتشغلهم علشان تاخد حقك منهم ولا أقولك بلاش انت برضه عايز تبنى مشروع على اساس كويس وتخلى نيتك صافية علشان ربنا يكرمك ، انت تفتح شركة للإستيراد والتصدير حاجه جامدة ومش محتاجة فلسفة ولا أقولك شركة صرافة كلها فلوس فى فلوس من غير وجع دماغ وانت تبقى المدير المسؤول وانت بتفهم فى التجارة يعنى الحياة حلوة وهتظبط الشغل ، وممكن تفتح مطعم ... مطعم تروح باصص لنفسك وتقول آيه دا مطعم يبقى معايا مليون وافكر فى مطعم وعك بقى الشيف مش عارف ماله اصل الاكل طلع مش حلو والكاشير سرق من مش عارف آيه وآيه اللى يجبرك على الموال دا انت راجل عايز تستمع بحياتك ........
تبص كده تلاقيك تقريبا صرفت اكتر من نص الفلوس وانت ما عملتش حاجه اصلا ومش عارف تعمل آيه بالباقى !! فأحسن فكرة تسيب الفلوس فى البنك وتاخد الفوائد تظبط بيها حياتك لحد ما تشوف هتعمل آيه بالباقى وتقعد تفكر تانى إزاى تقلل المصاريف مش لازم مستشفى ممكن تتبرع بفلوس لدار أيتام مش هياخدوا كتير واسمك برضه عملت حاجه وبدل موال الشقة ممكن تسافر برة بثمن الشقة ولما ربنا يكرم كده وتشوف هتعمل آيه تبقى ترجع وتشترى شقة ، اصل الفلوس دى انت برضه مش لاقيها فى الشارع صحيح هيا جت كده بس لازم برضه تفكر كويس فيها مش صرف وخلاص بس دا ما يمنعاش شوية حاجات كده ما هو برضه مش يبقى معاك وتبخل على نفسك ....... ينهار أبيض تلاقى الساعه دخلت على 8 الصبح والبنك هيبدأ يفتح تجرى على الحبل تلبس اللى عليه وتجرى على البنك والابتسامة من الودن للودن الدنيا مش شيلاك يجيى دورك للدخول الى المدير المسؤول ويسلمك المليون يطلب منك تحقيق الشخصية تطلع المحفظة مش معاك وانك من كتير الفرحة نسيتها فى البيت تقول للمدير ثوانى هروح البيت اجيبهالك وأرجع تجرى من البنك وانت كل اللى فى دمغاك هيا كدة لازم يطلع فيها حاجه تعكنن عليك بس مش مهم كويس انها جات فى البطاقة تجرى توقف تاكس وانت بتجرى أأأأأأوووووووووووووووعىىىىىىىىى حااااااااااسب طااااااااااخ
تفتح عنيك تلاقى نفسك فى سرير ولابس ابيض فى ابيض وحواليك خراطيم وجهاز عمال يعمل بيب بيب بيب تفتح عينك اكتر تلاقى ملاية سرير على وشك وسلك التليفون جنبك والمنبة عمال ترررن ترررن ...
برضه مش مستوعب تبص فى المنبة تلاقى الساعه 11 صباحا وانت ميعادك مع المدير اللى هيدلك المليون الساعه 8 تجرى على الحمام تغسل وشك وتلبس هدومك وتتأكد من تحقيق الشخصية وان كله تمام .
تخرج من العمارة عمال تبص حواليك وماشى على اقل من مهلك وتوقف تاكسى وتفضل تبص على الطريق وتركب وتقول للتاكسى البنك لو سمحت فيرد عليك أنهى بنك ؟ فترد عليه البنك آيه مش عارف البنك ! فيلف لك ويوقلك صباحك فل يا باشا البلد فيها 100 بنك حضرتك عايز انهى واحد ؟؟
تلاقى نفسك مش عارف ترد عليه .. صحيح اسم البنك آيه ؟ وفجأة تفكر بنك آيه صحيح وهروح أعمل آيه فيه ؟ تقول للسائق آسف نسيت حاجه فى البيت وتفتح الباب وتجرى على بيتك وانت بتقول 100 مرة اقولهم فى البيت بلاش طبيخ غامق بالليل ...........