مانوع يستاذ

مرة كنت فى وسط البلد ، وكان فى وجود مكثف من الأمن المركزى الله أعلم ليه، وانا فى العربية وكنا داخلين شارع فرعى، لقينا عسكرى بيقولنا " مانوع يستاذ " اللى هى ممنوع يا أستاذ. قولناله طيب لو عايزين ندخل الشارع ده ندخله منين ؟ قالنا مانوع يستاذ. قولناله طيب فى طريق تانى للشارع قال مانوع يستاذ وكأنها الكلمة الوحيدة فى قاموسه. قولت هيا جت عليك، إشمعنى انت اللى مش هتقول ممنوع ،لقيت فعلا ان الجملة دى مستخدمة كتير جدا فى قاموس ناس كتير وعلى مستويات كتير:-
مانوع يستاذ نتكلم فى الجنس، أياً كانت الطريقه والهدف من الكلام ده والنتيجة " إيناس الدغيدى "
مانوع يستاذ ننتقد رؤسأنا بشكل مباشر وأياً كان رئيس آيه والنتيجة " العيش كبير والعيشة حلوة وربنا يخلى سيادة الرئيس "
مانوع يستاذ تحلم بمستقبل افضل بعد ما تتخرج، لإن اللى اتعلمته حاجه والشغل حاجه تانية والنتيجة " مندوب مبيعات "
مانوع يستاذ نختلف فى رآئى فى الدين، لإن اسهل حاجه تتقال انك جاهل او كافر والنتيجة " اتصل على 19××× وتجيلك الفتوى هوا انت لسه هتتعب وتدور"
مانوع يستاذ نجتمع نناقش موضوع علشان نوصل لحل، لإن إتفقنا أللا نتفق والنتيجة " كل واحد ينام على الجنب اللى يريحه"
مانوع يستاذ يكون ليك صداقات مع الجنس الآخر، لإن محدش فاهم يعنى آيه صداقة والنتيجة " جواز عرفى "
مانوع يستاذ تتشرى كتاب، لإنك ليه تفكر أكتر مع انك ممكن تفكر أقل والنتيجة " اللمبى "
مانوع يستاذ تتجوز اللى بتحبها، لإن المجتمع فرض ان الحب مشاعر ما تأكلش عيش والجواز قسمة ونصيب والنتيجة " مجتمع مزيف "
مانوع يستاذ تقول صوتك فى الإنتخابات، لإن كدة كدة الحكومة بتعمل اللى على مزاجها والنتيجة " مات الرئيس عاش ابن الرئيس "
مانوع يستاذ مانوع يستاذ مانوع يستاذ والى مش مانوع يستاذ هوا انك تسمع دائما مانوع يستاذ