الخميس، يوليو 10، 2008

ثمن الغربة

فى تدوينة قبل كدة كنت بحاول اوصل لمعنى كلمة مصرى، علشان لما اقول انا مصرى ابقى فاهم على الاقل يعنى آيه.
لكن لما طلعت برة مصر وشوفت المصريين برة يعنى آيه خصوصا فى دول الخليج، لقيت الموضوع اكبر بكتير من تعريف كلمة مصر.
الفكرة اصبحت ببساطة محصورة فى كلمة واحده (بكام ؟).
وطالما كل حاجة بقت بثمن سواء معلن او غير معلن، حبيت اعرف آيه هو ثمن الغربة عند المصريين اللى موجودين بره مصر.
لقيت ان الفلوس تأتى فى المقام الاول عند كل اللى سألتهم، ومعظمهم مش فارق معاه الطريقة اللى تيجى بيها الفلوس.
المقام التانى هو انك تبقى عايش مرتاح، وتعريف مرتاح ده مختلف تماما من واحد للتانى.
• مرتاح يعنى ماحدش يوقفنى فى الشارع يقولى بطاقتك ويسحلنى علشان شكلى مش عاجبه.
• مرتاح يعنى مرتبى يكفينى اكل وشرب وعربيه صغيره وتعليم كويس للأولاد.
• مرتاح يعنى ألاقى الشغل اللى يناسب قدراتى وطموحى فى الحياة وأقدر اثبت فيه نفسى بنفسى مش بالواسطة.
• مرتاح يعنى اقدر اغير صورة الناس عنى فى بلدى وانهم يشفونى ناجح فى عينهم.
• مرتاح انى ابقى آمن على مراتى واولادى فى اى مكان وفى اى وقت.
• مرتاح انى لما اشترى حاجه ببقى ضامن ان مش هيضحك عليا فيها ولا فى التوكيل بتاعها.
• مرتاح انى بتعامل كبنى أدم لأول مرة فى حياتى.
المقام الثالث هو المستقبل المهنى، انهم ياخدو الشغل هنا مجرد خطوة يرجعو مصر بعدها لأماكن أحسن بمرتبات احسن.
الغريبة ان نسبئة قليله جدا من اللى سألتهم ثمن غربتك آيه، عايز يرجع مصر قريب او يرجع من الاساس.
والأغرب ان ولا واحد فيهم مرتاح نفسيا زى ما كان فى مصر، حتى لو كان زبال فى مصر وهنا بقى وزير.
كل واحد ماسك فى الشغل بتاعه كأنه ملاذه الوحيد فى الدنيا، وانه لو سابه هيترمى فى الشارع – اللى هو يرجع مصر – وعنده استعداد يعمل اى حاجه يضمن بيها بقاؤه فى الشغل ده مهما كان .
المصريين جوه الشغل الواحد بيقطعو بعض، بأسوأ معاملة وبأحقاد لا متناهيه. انما المصريين بره الشغل تلاقيهم اكتر ناس تاخف على مصلحتك من غير ما تعرفك وتلاقيه مهتم جدا يعملك اى خدمة فى استطاعته.
لو دخلت اى محل تشترى اى حاجه تدور على المصرى اللى شغال فيه فين علشان يظبطلك كل حاجه، سعراً ومقارنة بأماكن تانية، وأوقات شراء.
تقريبا انا سألت حوالى 20 شخص مختلفين المهن ومن اماكن مختلفة فى مصر.
ما لقتيش حد فيهم مقتنع انه بياخد ثمن غربته بره مصر، ومع ذلك بلاقيهم شايفين ان اى مكان احسن من مصر واللى فيها ، حتى لو سابها مهندس وطلع بره سواق تاكسى.
لقيت ان الأهم من انك تنجح فى اى بلد تانية غير مصر، هو انك تدور وتعرف وتسعى انك تاخد الثمن اللى يخليك تسيب مصر بكل حاجه فيها كويسه ولو قليله ، وحاجات وحشة ولو كتيره. لإن ده اغلى حاجه بتدفعها فى حياتك، ثمن الغربة.



إرسال تعليق