يوم اليتيم

النهاردة يوم مميز جداً. النهاردة اول جمعة فى شهر ابريل، يوم اليتيم.
فى ناس بتروح دار الايتام يوم فى السنة وفى الغالب النهاردة، وفى ناس بتروح كل ما ظروفها تسمح، وفى ناس ما شافتش اساسا دار ايتام قبل كده.
انا كنت واحد من الناس دول لحد سنتين فاتو. وكنت بقول انا نفسى طبعا بس فين؟ اصل بعيد! اى كلام وخلاص، مجرد حجه انى ما اعملش لإنى ببساطه مش عارف.
فى رمضان اللى قبل اللى فات اختى جت قالتلنا ان فى دار ايتام قريبه مننا، وانها راحت هيا وجوزها وقعدوا هناك شوية. انا فرحت جدا انى اخيرا هبطل اقول اعذار وهقدر اشارك فعلا.روحت دار رشدى للأيتام وأد آيه انبهرت بالمكان ونظافته وراعيته للبنات الأيتام. ومن ساعتها وانا تقريبا بروح كل ما ظروفى تسمح اقعد معاهم شوية وأعمل اللى اقدر عليه.
النهاردة فى الاحتفال بيوم اليتيم، وأحنا بنلعب جت صباع المحشى ( فاطمة ) وسألتنى سؤال غريب.ليه بنشوف الناس مرة واحده ومش بنشوفها تانى ؟ وشاورت على ناس اول مرة تشوفهم، وكأنها متأكده انها آخر مرة هتشوفهم فيها.
قولتلها مش عارف!! تعالى نروح نسألهم. أخدتها لواحد من اللى شاورت عليه، وهى سألته: عمو عمو انت هتيجى هنا تانى؟ قالها طبعا هاجى هنا تانى! قالتله طيب احلف انك هتيجى هنا تانى! قالها والله هاجى هنا تانى وهاجى كتير كمان.
قالتله طيب انت ليه ما جيتش قبل كده؟ قالها انا ماكنتش اعرف انكو هنا اصلا، بس خلاص انا عرفت وهاجى كتير. ولو ماجتش اعملى فيا اللى انتى عايزاه.
قالتلو عمو لو ماجتش تانى هتبقى زينا ومش هتلاقى حد يجيلك يلعب معاك.
الولد تنح من الجملة وصياغتها وانا كمان بقيت مش عارف اقولها آيه. والولد قالها طيييييييب تعالى بقى لما نشوف ان كنت جاى ولا لأ. وشالها ولعب معاها وانا بصيت له انى مستغرب من اللى قالتله و هوا كمان بص بإستغراب بس بقى ما يقدرش ما يجيش تانى.

اللى فى النص انطونيو من اسبانيا جه يشارك فى اليوم



اتمنى من ان الولد ده يروح الدار تانى ويعلب معاهم تانى ومايبقاش علاقته بالدار مجرد مشاركه فى يوم اليتيم وبس، لأن السنة كلها يوم اليتيم.