الجمعة، مايو 11، 2007

الثقافة

مرة كنت قاعد مع مدونين دماغ وإتسال سؤال لولبى، يعنى آيه إنسان مثقف ؟
وكان فى إجابة من ضمن الإجابات إن المثقف اللى بيعرف حاجات قليلة عن حاجات كتيره.
لو فرضنا ان ده مفهوم الإنسان المثقف، تعالو نشوف حال الشعب المثقف بتاعنا مفهومه آيه عن الثقافة اللى أهم مصادرها عندهم الإعلام، سواء مرئى او مسموع او مقروء.
طبعا المسموع بقى موضه قديمة وما بيقدرش ينقل الصورة كاملة ونسبة تغطيته مش عالية، والمقروء لا سمح الله مش من شيمة العرب الجدد واى محاولة مقارنة بمستوى قرأة المجتمع العربى كله ببلد واحد غربيه او حتى مع اسرائيل هنلاقى كارثة، فيفضل مصدر الثقافة الماتح لمعظم الشعب هو الاعلام المرئى.
الدش وعليك خير بقى طبيعى جدا آلاقى مطرب يطلع قول انا قدوة للشباب ولازم اجدد فى لبسى وإستايلى وطريقة ظهورى علشان الشباب يلاقى مثل يمشى عليه.
ياخى – كلمة قبيحة – عليك وعلى القدوة اللى بتقدمها للشباب.
وتلاقى مطرب تانى طلع لابس شراب فى دماغه تانى يوم الصبح تلاقى البلد كلها شربات وهى مبتسمه وفرحانه انها بتتطور وماشية مع العصر مش متأخرة ولا متخلفة لا سمح الله.
تطلع راقصة قد الدنيا تطلع تقول ان الرقص مش حرام، وانه عمل شريف. وبما ان العمل عبادة فهي كده كإنها بتصلى لما ترقص رقص محترم، لا يثير الغرائز لا سمح الله.
طيب دى يتقالها آيه؟ حتى الكلام القبيح خلى من معنى ممكن وصف الإنسانة – إن جاز وصفها كذلك – دى بيه.
يطلع لاعب كورة جامد يضرب ظابط شرطه او أمين أو حتى عسكرى نفر، طيب على آيه الإحساس انك خارق للعادة ؟ عامل فيها السبع رجالة فى بعض ليه ؟ وتلاقى الناس تهتم جدا بالموضوع ويفضل فى حلقات نقاشهم لمدة طويلة وبإهتمام بالغ، علشان يوصلو سر تفوق اللاعب على المواطن الغلبان فى المطالبة بحق الرد على إساءات الشرطة للمواطنين فى حالة حدوثها.
سيبكم من الناس الوحشة دى كلها، تعالو على البرامج الحوارية اللى بتطلع فى التليفزيون عمال على بطال، يجيبو واحد صاحب رأئى ما ، ويقعدوه مع واحد صاحب رأئى مضاد تماما شكلاً وموضعاً. الطبيعى آيه اللى يحصل لما تحط ديكين من نوع مختلف فى مكان واحد ؟ لازم يتناطحو وتبقى خناقة، الناس تتبسط ان فى حد بيزعق وحد بيرد عليه وشوية وهيمسكو فى بعض. واللى يحصل إقبال جماهيرى والنتيجة إعلانات.
حلو قوى الوصول للإعلانات.. فكرت كتير مين اصلا بيتصل بإعلانات 0900 والحوار ده، مين من السذاجة انه يشارك فى تفاهه من النوع ده؟ وتلاقى الاعلان بيحمل مضمون ثابت. يجيب واحد يائس من حياته ومش عارف يعمل آيه، ويركز قوى انه مش طايق نفسه، وفى الناحية التانية يجيب واحد قاعد فى البيسين حواليه بنات بالبكينى وفى الخلفية بيت فخم، وان الحل علشان توصل من الشخص ده للشخص ده هوا الاتصال على الرقم التالى وانت تكسب وتتظبط فى الحياة.
ولا الاعلان ان علشان يبقى عندك عربية مرسيدس يا إما تتعب ويطلع عين اللى خلفوك وفى الآخر تحصل على العربية او انك بكل بساطة تشترى المنتج ده وهو يجيبلك العربية لحد عندك.
يا سلام بالبساطة دى الحياة مش مستاهلة تعب ولا مجهود، وانت تتعب ليه اصلا وتفكر ليه من الاساس، انت الغى دماغك واتصل وانت مغمض على الرقم وكل مشاكلك تتحل بكل بساطة وسهولة.
فعلا ونعم الثقافة.


هناك 6 تعليقات:

انا ادون هنا يقول...

يااااه يا محمد
انت بتتكلم في ايه
ثقافه يعني ايه وليه
ماحنا كده ميت فل
عايز ايه اكتر من كده
يعني عايز الناس تبقي بتفهم يعني في كل حاجه يعني
يعني يطلعوا من هدومهم عشان يعجبوا
محمد كل واحد بيكتفي انه يفهم تخصصه وبس وده ان فهمه اصلا واتقنه

انا اسفه عالتطويل بس اصلي مبقوقه

بلال حســــنى يقول...

مساء الفل
بطلو بقى حقد دفين على مقدرات الشعب المعطاء ده
حتى حبة الهبل الربانى البيور حسدين الناس عليهم
الاخ العزيز عايش منصور
سيب الشعب يعيش
وكل عيش
مدونتك مترقبه
برجاء الاتصال على 123
بسعر المكالمه العاديه

الوردة السوداء يقول...

اه معلش بقى
شعبنا وبلدنا
هنعمل ايه

اعلانتنا
واغانينا
ورقاصينا


نحرقهم؟
ولا نحرق نفسنا

اتفضل عندنا يقول...

صباحك فل يا باشا...شوف بقي انا من انصار نظرية المؤامره و في نفس الوقت شايفه ان احنا بقينا شعب عايز ضرب البلغه القديمه و لا مؤاخذه..ليه؟ اقولك انا...طبعا مش هننكر ان الاعلام المفتوح و القنوات الفضائيه و الانترنت فتح عيون الشباب علي حاجات عمر مااهالينا سمعواعنها بالإضافه الا ان في ظل الهيمنه الامريكيه اصبح كل ماهو امريكي حلم و فخر لينا، كل بنت كشفت بطنها بقت بت جامده و كل واد لزق شعره بقى واد كوول ..و هو ده اللي الغرب عايزه منا..اجيال خايبه، نيجي بقي لينا احنا، الاهالي بقت مكبره دماغها و مش فارق معاهاالعيال ده بتمسك كتاب ولا لاء ولا بتعرف اي حاجه في الدنيا، حتي الغلابه في البلد دي طالهم الهبل، تلاقي واحد غلبان و بيته ماشي بالعافيه و مع ذلك يجب موبايل بالقسط و يستلف عشان قسط الدش !
انا بقي راضيه ذمتك، ده منظر شعب يتكلم عن ثقافه؟
تحياتي

kaed يقول...

أخى محمد
هذا حال مصر فى هذا الزمان
مرتع للراقصات و الفنانين الكسر ولاعبى الكرة النص لبة و أشباة الرجال
وربنا يستر على اللى جاى

علا من غزة يقول...



شكلك من انصار سوسة المفروسة

انك مفروس جدا من حاجات كتير زي حالات معظم الناس الي بتفكر

هو اساسا الي معتمد على التلفزيون انو يكون مثقف عمره ما بيكون مثقف

لأن التلفزيون بيخليك تشوف وتسمع حاجات زي ما هما عايزين مش زي ما انت عايز

! فاهم قصدي

المهم ,, خليك متفائل بالمستقبل وربنا يصبرنا جميعا


تحياتي